2019-cu ilin noyabrın 19-dan itkin düşən Tovuz rayonunun Dondar Quşçu kənd sakini, 10 yaşlı Nərmin Quliyevanın qətlə yetirilərək yandırılan meyiti 2020-ci il yanvarın 6-da kənd ərazisində aşkar edilib. Cinayəti törətməkdə ittiham edilən İlkin Süleymanovun isə məhkəmə prosesi Gəncə Ağır Cinayətlər Məhkəməsində hakim Dadaş İmanovun sədrliyi ilə keçirilir. 

Bu gün Dondar Quşçu kəndinin bir qrup sakini Nərmin Quliyevanın cəsədinin tapıldığı ərazidə toplaşıb. Onlar İlkin Süleymanovun azadlığa buraxılmasını, cinayətkarların tapılaraq cəzalandırılmasını tələb ediblər. 

Kənd sakini Sevda Vəliyeva bildirib ki, İlkin Süleymanovun həbsi qərəzlidir, onun bu cinayət işində heç bir günahı yoxdur:

"Yanvar ayının 6-da tapılan cəsəddən heç bir iy, qoxu gəlməyib. O uşaq 5 dəqiqəyə o qədər yana bilməz. İlkin Süleymanovun tutulmasında əsas günahkarlardan biri Tovuz Rayon Polis Şöbəsinin sabiq rəisi Şirzad Əsgərovdur. O bu işə qərəzli yanaşdı, mənə dedi ki, günahkarın tapılıb cəzalandırılmasını tələb etmə. Günahkar Şirzad Əsgərov başda olmaqla bir sıra məmurlardır. Biz cənab Prezidentə üz tuturuq, xahiş edirik ki, bu cinayət işinin ədalətli keçirilməsində köməklik göstərsin".

Qeyd edək ki, İlkin Süleymanovun növbəti məhkəmə prosesi iyun ayının 30-u saat 15:00-da Gəncə Ağır Cinayətlər Məhkəməsində keçiriləcək.