Tramp İran gəmilərini məhv etməyi tapşırdı

ABŞ Prezidenti Donald Tramp Donanmaya ABŞ gəmilərinə mane olan hər hansı bir İran gəmisini məhv etməyi tapşırıb.

Oxu24.com xəbər verir ki, bu haqda o, 22 aprel çərşənbə günü Twitter-də yazıb.

“ABŞ Hərbi Dəniz Qüvvələrinə göstəriş verdim ki, Amerika gəmiləri üçün dənizdə maneələr yaradan bütün İran hərbi gəmilərini atəşə tutsun və məhv etsin”. Ağ Evin sahibi belə deyib.

Bir həftə əvvəl ABŞ Hərbi Dəniz Qüvvələri 11 İran hərbi gəmisinin Fars körfəzindəki gəmilərinə yaxınlaşdıqlarını bildirib və bu hərəkətləri “təxribatçı” adlandırıb.

İran hərbi qüvvələri cavab olaraq ABŞ-ın Fars körfəzindəki hər hansı bir qanunsuz hərəkətinin İranın reaksiyasına səbəb olacağını söyləyib.

Xatırladaq ki, 2018-ci ilin mayında ABŞ birtərəfli qaydada nüvə sazişindən çıxıb.

Tezliklə İran Vaşinqtonun tətbiq etdiyi sanksiyalar səbəbindən öhdəliklərini yerinə yetirməkdən imtina edib.

Bu baxımdan keçən il Fars körfəzindəki vəziyyət həddindən artıq qızışıb və İran bir neçə neft tankerini ələ keçirib.