"Whatsapp"da şok XƏBƏRDARLIQ: "Telefonlarınızı söndürün" mesajı yayılır

Sosial şəbəkələrdə, xüsusilə "Whatsapp"da "Kosmik şüalar Yerə yaxın keçəcək" başlıqlı mesaj yayılıb.

BAKU.WS xəbər verir ki, yayılan mesajda bunlar yazılıb:

"Bu gün saat 00:30-dan 03:30-dək telefonu, planşeti bədəndən uzaqlaşdırın. Qırğızıstan televiziyası xəbərlərdə elan etdi. Xahiş edirəm, ailənizə və dostlarınıza deyin ki, bu gün saat 00:30-dan 03:30-dək planetimizdə çox yüksək radiasiya olacaq. 

Kosmik şüalar Yerə yaxın keçəcək. Buna görə xahiş edirəm, cib telefonlarınızı söndürün. Cihazı bədəninizə yaxın buraxmayın, bu, sizə dəhşətli zərər verə bilər. Google və NASA BBC News-a baxın. Bu mesajı sizin üçün çox əziz olan bütün insanlara göndərin!"
 

Kiçik araşdırmamızdan sonra məlum oldu ki, bu mesaj 4 il bundan öncə yayılıb. Dünya mətbuatında da yer alan həmin mesaj əslində dezinformasiyadan başqa bir şey deyil. 

Mütəxəssislər isə bildirirlər ki, elə bir təhlükə varsa, bunu Qırğızıstan TV-dən deyil, NASA-nın yaydığı proqnozlardan görə bilərik. Bununla yanaşı, ay və günəş radiasiya mənbəyi deyil. 

Ekspertlər söyləyirlər ki, bu cür kosmik fırtınalardan mobil telefonlar ziyan görmür. Əgər kosmik fırtınalar olsaydı, nəticədə daha çox aviasiya sektoru, kosmosdakı peyklər, rabitə, bank əməliyyatları və s. kimi sahələrdə problemlər yaranardı.