Xalq rəssamı: “Məktəblərdə vahid geyim formasının tətbiqini dəstəkləyirəm”

CƏMİYYƏT

208

14.10.2026, 14:29

Xəbərlərimizi Google-da izləyin

Yeniliklərdən dərhal xəbərdar olun

Xalq rəssamı, professor Səhlab Məmmədov məktəblərdə vahid geyim formasının tətbiqini dəstəklədiyini və bu qərarla tam razı olduğunu bildirib.

O, Oxu24.com-a açıqlamasında şagirdlər arasında vahidliyin qorunmasının, təhsil müəssisələrində nizam-intizamın təmin edilməsinin və uşaqların tədris prosesinə diqqətinin artırılmasının vacibliyini vurğulayıb.

Səhlab Məmmədovun sözlərinə görə, dövlət tərəfindən qəbul edilən qərarlara hörmətlə yanaşmaq və qanunvericiliyin tələblərinə əməl etmək hər bir vətəndaşın məsuliyyətidir.

“Məktəblərdə vahid geyim formasının tətbiqini dəstəkləyirəm və bu qərarla tamamilə razıyam. Dövlət hansı qərarı qəbul edirsə, biz də ona əməl etməliyik. Məktəblərdə müəyyən qaydaların olması vacibdir. Bu, həm nizam-intizamın qorunmasına, həm də şagirdlərin diqqətlərini geyimə deyil, təhsilə yönəltmələrinə kömək edir”, – deyə Xalq rəssamı bildirib.

Səhlab Məmmədov, həmçinin, cəmiyyətdə narazılıq yaratmağa və uşaqları müxtəlif təxribatlara cəlb etməyə çalışan şəxslərin fəaliyyətini tənqid edib. O hesab edir ki, bu cür hallara qarşı müvafiq tədbirlər görülməli, məktəblərin təhlükəsizliyi və təhsil mühitinin sabitliyi qorunmalıdır.

“İnsanlar arasında narazılıq yaratmağa, uşaqları təxribata çəkməyə çalışan şəxslər xarici dövlətlərdən göstəriş alan və onların maraqlarına xidmət edən adamlardır. Düşünürəm ki, dövlət bu cür halların qarşısını alır və bundan sonra da alacaq. Əsas məqsədimiz uşaqlarımızın təhlükəsizliyini qorumaq, onların sağlam mühitdə təhsil almalarına şərait yaratmaqdır”, – deyə professor qeyd edib.

Xalq rəssamı sonda məktəblərdə qayda-qanunun qorunmasının və dövlətin qəbul etdiyi qərarlara əməl olunmasının əhəmiyyətini vurğulayıb.

Turan Etibaroğlu