“Nəcməddin Sadıqov qışqırdı ki, Madagiz niyə vurulmur?” – 44 günlük müharibənin ilk anları

Hərbi bloger Tofiq Şahmuradov 27 Sentyabr – Vətən müharibəsinin ilk dəqiqələri ilə bağlı xatirələrini öz kitabında bölüşüb.

Globalinfo.az xəbər verir ki, müəllif döyüşün başlanğıcında komanda məntəqəsində yaşanan gərgin anlardan bəhs edib.

Onun yazdığına görə, artilleriya atəşinin davam etdiyi vaxt quru qoşunları tank və BMP-lərin dəstəyi ilə hücuma keçib:

“Döyüşün ilk dəqiqələridir. Təxminən bu saatlar olardı. Zabitlərimizin gözündə həm böyük bir sevinc, həm də üzərlərinə düşən böyük məsuliyyətdən irəli gələn bir gərginlik hiss olunur.

Şiddətli artilleriya atəşi davam edir. Artıq quru qoşunlarımız tankların və BMP-lərin dəstəyi ilə hücuma keçiblər. Həddindən artıq şiddətli döyüş gedir.

Bu zaman Nəcməddinin (Sadıqov) qışqırtılı səsi eşidilir. Mən həmin səsi Birinci Qarabağ müharibəsindən bəzi videolarda eşitmişdim. Qışqırır:

– Niyə Madagiz vurulmur? Niyə Madagiz vurulmur?

– Madagiz kimin planlaşdırılmış hədəfidir?

Şimal-qərb cəbhəsində artilleriya bölmələrinə rəhbərlik edən Raket-Artilleriya Qoşunlarının qərargah rəisi, general-mayor Vüqar Əlverdiyev ayağa qalxdı və dedi:

– Cənab Baş Qərargah rəisi, Madagiz 9xx hədəfidir.

Nəcməddin yenə qışqırır:

– 9xx-in komandiri kimdir? Haradadır o?

9xx-in komandiri də mənim yanımda oturub – rus dilini o qədər də yaxşı bilməyən polkovnik Eldəniz Abdullayev idi.

Mən Eldənizə dedim:

– Sənin adın çəkilir, səni çağırır.

Eldəniz Abdullayev yerindən qalxdı və özünü təqdim etdi.

Nəcməddin rusca deyir:

– Niyə Madagiz vurulmur? Mən vurulduğunu görmürəm.

Eldəniz rus dilini yaxşı bilmədiyindən deyilənləri tam anlamadı. Əyilib mənə dedi:

– Nə deyir?

Dedim:

– Deyir ki, niyə Madagiz vurulmur?

Madagiz də həmin vaxt 9xx-in tərkibində olan “Pion” divizionunun hədəfi idi. “Pion” divizionuna isə bizim dostumuz, polkovnik-leytenant Rüstəm Mehdiyev rəhbərlik edirdi.

Eldəniz əlindəki “Tetra” ilə Rüstəmə zəng edib deyir:

– Mehdiyev, niyə vurmursan Madagizi? Niyə vurmursan oranı?

Rüstəm isə cavab verir:

– Cənab polkovnik, “vurmursan” nədir? Orada daşı daş üstündə qoymamışam, vurmamaq nədir?

Elə həmin anda məndən böyük bir gülümsəmə çıxdı.

Döyüşün ən gərgin anlarının içində belə, yaddaşımda qalan belə bir xatirə yaşandı”.

Həmçinin oxuyun

Bu, qardaş Türkiyənin birinci oyunu idi — Tarixi şəhərimiz xəritəmizdən SİLİNDİ

Tələbələrin təqaüdləri artırılacaq? - AÇIQLAMA 

YAP Gənclər Birliyinin yeni sədri kimdir? - DOSYE

İlham Əliyev SƏRƏNCAM İMZALADI