Bakı tıxaclarının səbəbi regionlardan gələnlər deyil? – Ekspertdən AÇIQLAMA

CƏMİYYƏT

24.09.2026, 19:51

Xəbərlərimizi Google-da izləyin

Yeniliklərdən dərhal xəbərdar olun

Son günlər paytaxt Bakıda müşahidə olunan sıxlıq və nəqliyyat problemi cəmiyyətin əsas müzakirə mövzularından birinə çevrilib. Xüsusilə şəhər daxilində yolların bağlanması və nəqliyyatın hərəkətində yaranan məhdudiyyətlər sürücülərə ciddi çətinliklər yaradır. Bir çox vətəndaş bu vəziyyətin əsas səbəbi kimi regionlardan paytaxta gələn əhalinin axınını və nəqliyyat sisteminə düşən yükü göstərir. Lakin milyonluq meqapolis olan Bakıda bütün inzibati qurumların, universitetlərin və iri biznes mərkəzlərinin mərkəzdə cəmləşməsi də qaçılmaz sıxlıqlara səbəb olur. Paytaxt həm də böyük turistik, tarixi və sənaye şəhəri kimi hər gün minlərlə nəqliyyat vasitəsini və insanı qəbul edir. Regionlardan gələn axının da mövcud infrastruktura təsiri danılmazdır və bu proses davam etməkdədir. Yaranmış problemin köklü şəkildə həlli yolları və tıxacların aradan qaldırılması istiqamətində mütəxəssislərin yanaşmaları diqqət çəkir.

Oxu24.com olaraq bu aktual mövzu ilə bağlı tanınmış mütəxəssisin fikirlərini oxucularımıza çatdırırıq.

Məsələ ilə əlaqədar danışan nəqliyyat eksperti Eldəniz Cəfərov paytaxtdakı tıxacların real səbəblərini, əhali axınının təsirini və problemin aradan qaldırılması üçün görülməli olan tədbirləri açıqlayıb.

Ekspert bildirib ki, Bakı şəhərində sıxlıqların və tıxacların yaranmasının əsas səbəbi şəhərdəki yolların bağlanmasıdır:

“Paytaxt çoxmilyonlu, iri sənaye, turistik və tarixi şəhər olduğu üçün burada sıxlığın olması normaldır. Bütün inzibati orqanlar, binalar, universitetlər, alış-veriş və biznes mərkəzləri məhz Bakının mərkəzində cəmləşib”.

Onun sözlərinə görə, regionların və ətraf qəsəbələrin nəqliyyat sisteminə təsiri var, çünki hər gün Bakıya ətraf qəsəbə şəhərlərdən təxminən 300 min nəqliyyat vasitəsi daxil olub geri qayıdır:

“Bu şəxslər əsasən Bakıda təhsil alanlar və işləyənlərdir ki, onlar aqlomerasiyadan gəlirlər. Onları tam olaraq region adlandırmaq düzgün deyil, çünki əslində başqa rayonun qəsəbələri olsa da, Bakıya bağlı olan ərazilərdir”.

Eldəniz Cəfərov qeyd edib ki, Bakı şəhərində hər həftə keçirilən və yolların bağlanması ilə nəticələnən tədbirlər differensiallaşdırılmalıdır. Həmin tədbirlər ildə heç olmasa iki dəfə Bakıda keçirilməli, qalanları isə Sumqayıt, Gəncə, Qəbələ və Lənkəran kimi digər şəhərlərə bölünməlidir. Tıxacları aradan qaldırmaq üçün yolların zərurət olmadığı halda səhər və axşam pik saatlarında bağlanması təcrübəsinə son qoyulmalıdır.

Ekspert həmçinin vurğulayıb ki, yolların hər səhər və axşam bağlanması təcrübəsi ölkə iqtisadiyyatına külli miqdarda ziyan vurur. Alternativ olaraq, Bakıdan kənarda iri akademik şəhərciklərin tikilməsi həm tələbələrin təhsil keyfiyyətini artırar, həm də paytaxt mərkəzindəki nəqliyyat yükünü azaldar.

Çimnaz Telmanqızı

Həmçinin oxuyun