Həddindən artıq acı yemək mədə xərçəngi riskini artıra bilər - Həkim xəbərdarlıq etdi

CƏMİYYƏT

256

04.09.2026, 23:00

Xəbərlərimizi Google-da izləyin

Yeniliklərdən dərhal xəbərdar olun

Həddindən artıq acı sous və qidaların istehlakı mədə-bağırsaq traktını qıcıqlandırmaqla yanaşı, uzunmüddətli və yüksək miqdarda istifadə zamanı mədə xərçəngi riskini də artıra bilər.

Oxu24.com xəbər verir ki, bunu Dövlət Maarif Universitetinin Tibb fakültəsinin Cərrahiyyə kafedrasının baş müəllimi, cərrah Aleksandr Umnov “Gazeta.Ru”ya açıqlamasında bildirib.

Mütəxəssisin sözlərinə görə, sağlam insanlar üçün gündə 5-10 qram təzə çili və ya yarım çay qaşığı qurudulmuş üyüdülmüş bibər məqbul hesab olunur. Mağazada satılan acı souslarda isə bibərlə yanaşı, çoxlu duz, sirkə, konservant və şəkər olduğundan onların gündəlik miqdarı bir neçə çay qaşığından çox olmamalıdır. Belə sousların hər gün deyil, mümkün qədər ara-sıra istehlak edilməsi tövsiyə olunur.

Umnov qeyd edib ki, sağlam insanlar orta dərəcədə acı yeməkləri həftədə 2-3 dəfə qəbul edə bilərlər. Qastrit, xora, reflüks xəstəliyi, pankreatit və kolit kimi mədə-bağırsaq xəstəlikləri olan şəxslər isə acı qidaları yalnız davamlı remissiya dövründə, minimal miqdarda və həkimlə məsləhətləşdikdən sonra qəbul etməlidirlər.

Cərrahın sözlərinə görə, təbii bibərin tərkibindəki kapsaisin orta miqdarda istifadə edildikdə faydalı ola bilər. Bu maddə selikli qişada mikrosirkulyasiyanı yaxşılaşdırır, qoruyucu seliyin ifrazını artırır, Helicobacter pylori bakteriyasının fəaliyyətini zəiflədə və antioksidant təsir göstərə bilər.

Bununla belə, sənaye üsulu ilə hazırlanan acı sousların tərkibindəki duz, sirkə, monosodium qlutamat və süni aromatizatorlar selikli qişanı daha güclü qıcıqlandıra bilər.

Umnov bildirib ki, acı qidaların sistemli şəkildə həddindən artıq qəbulu ürək yanmasına, ishala və defekasiya zamanı yanma hissinə səbəb ola bilər. Mədə-bağırsaq xəstəlikləri olan insanlarda isə qastrit və xoranın kəskinləşməsi, ağrı, ürəkbulanma və eroziyaların sağalmasının ləngiməsi mümkündür.

Həkim vurğulayıb ki, acı bibərin özü əvvəldən mövcud olmayan mədə xorasına səbəb olmur. Lakin yüksək dozada kapsaisinin uzun müddət həddindən artıq qəbulu bəzi araşdırmalara əsasən mədə və qida borusu xərçəngi riskini artıra bilər. Aşağı dozada isə kapsaisinin əksinə, qoruyucu təsir göstərə biləcəyi bildirilir.

Mütəxəssis acı qidaları acqarına yeməməyi tövsiyə edib. Ağırlıq, ürək yanması və ağrı kimi şikayətlər yarandıqda isə acı qidaları rasiondan çıxarmağı və qastroenteroloqa müraciət etməyi məsləhət görüb. Onun sözlərinə görə, qastrit və ya xoranın olub-olmadığını müayinə aparmadan müəyyən etmək mümkün deyil.

Umnov həmçinin qeyd edib ki, əvvəllər acı qidalar qəbul etməyən insanlar istifadəyə çox kəskin bibərlərdən deyil, daha yumşaq növlərdən başlamalıdırlar.

Həmçinin oxuyun