Bakı və Abşeronda rekord dolu və supergüceyrə: ATMOSFERDƏ NƏ BAŞ VERDİ?  

Mayın 26-da Bakı və Abşeron yarımadasında müşahidə olunan güclü leysan, iri dolu və nəhəng dalğa formalı buludlar son illərin ən diqqətçəkən hava hadisələrindən biri oldu. Xüsusilə yağan iri dolu dənələri və yaratdığı fəsadlar paytaxt sakinlərini həm heyrətləndirdi, həm də təşvişə saldı.

Oxu24.com xəbər verir ki, Bakıya şimal istiqamətindən — Sumqayıt tərəfdən daxil olan superhüceyrə buludları əvvəlcə Sumqayıt ərazisində aktivləşdi. Daha sonra şimaldan cənuba doğru hərəkət edən bu sistem cənubdan gələn isti və rütubətli hava axını ilə toqquşdu.

Bu toqquşma nəticəsində atmosferdə güclü şaquli hava axınları yarandı. Bulud daxilində yağış damcıları dəfələrlə yuxarı-aşağı hərəkət edərək dondu və iri dolu dənələrinə çevrildi. Nəticədə Bakı və Abşeron yarımadasında son illərin ən intensiv dolu hadisələrindən biri qeydə alındı.

 Hadisə sürətli hərəkət edən fırtına xətti xarakteri daşıdığı üçün şəhər üzərindən qısa müddətdə keçdi. Lakin həmin dəqiqələr ərzində yağan iri dolu dənələri bəzi ərazilərdə avtomobillərə, dam örtüklərinə və pəncərələrə ziyan vurdu. Küçədə hazırlıqsız yaxalanan insanlar üçün bir neçə dəqiqəlik ciddi çətinlik yarandı.

Sosial şəbəkələrdə yayılan nəhəng qaranlıq bulud isə meteorologiyada “Rəf buludu” (Shelf Cloud / Arcus) adlanır. Bu buludlar güclü fırtına cəbhəsinin ön hissəsində yaranır və adətən qəfil skval küləyi, intensiv leysan və iri dolu ilə müşahidə olunur.

 Radar görüntülərinə əsasən, bu güclü sistem Xəzər dənizi üzərində formalaşmışdı. Dənizdən gələn yüksək rütubət və güclü buxarlanma bulud daxilindəki enerjini maksimum səviyyəyə çatdırdı. Superhüceyrə quruya daxil olduqda isə topladığı enerjini dolu, leysan və güclü külək şəklində boşaltdı.

 NƏTİCƏ:

Mayın 26-da Bakı və Abşeronda müşahidə olunan hadisə bir daha göstərdi ki, Xəzər üzərində formalaşan superhüceyrələr qısa müddətdə çox təhlükəli hava şəraiti yarada bilir və paytaxt üçün ciddi risk hesab olunur.

Jalə

Həmçinin oxuyun

SON DƏQİQƏ!Mehdiyevin ailəsində faciə:Ölən var

15 milyard dollarlıq hədəf: Türkiyə və Azərbaycan ticarətdə yeni mərhələyə keçir—EKSPERTLƏRDƏN ŞƏRH  

SON DƏQİQƏ! Daşqın və sellə bağlı XƏBƏRDARLIQ

SON DƏQİQƏ! Prezidentin köməkçisi tapşırıq verdi: Bu məsələ araşdırılır