Uşaqları kim müalicə edəcək?   —  Həqiqətən də yeganə uşaq radioloqu Asif Nəsirli idi?

Xəbər verdiyimiz kimi, mayın 5-də Milli Onkologiya Mərkəzində (MOM) baş vermiş bədbəxt hadisə nəticəsində ağır yaralanan həkim-radioloq Asif Akif oğlu Nəsirli müalicə olunduğu xəstəxanada vəfat edib. 44 yaşlı mütəxəssis aprelin 30-da MOM-un Radiologiya şöbəsində törədilən partlayış zamanı ağır xəsarət almışdı. O, bu gün doğulduğu Göyçay rayonunun Qaraxıdırlı kəndində torpağa tapşırılıb.

Sosial şəbəkələrdə və tibb ictimaiyyətində yayılan ən sarsıdıcı iddialardan biri isə Asif Nəsirlinin Azərbaycanda yeganə uşaq radioloqu olması ilə bağlıdır. O, 2008-ci ildən Milli Onkologiya Mərkəzinin həm Şüa terapiyası şöbəsində, həm də Uşaq klinikasında radiasiya onkoloqu vəzifəsində çalışaraq minlərlə uşağın həyatı üçün mübarizə aparıb.

Bəs uşaq radioloqu çatışmazlığı niyə bu qədər qorxuludur?

Mövzu ilə bağlı onkoloq həkim Ulduz Vəliyeva  uşaq radiologiyasının əhəmiyyəti barədə  Oxu24.com-a açıqlamasında bu suala aydınlıq gətirib. 

Həkim Ulduz Vəliyeva qeyd edir ki, uşaqlarda rast gəlinən şişlər əsasən teratogen mənşəli (anadan gəlmə, bətn daxilində inkişaf edən) olduğu üçün diaqnostika və müalicə prosesi böyük həssaslıq tələb edir:

“Uşaq onkologiyasında radioloqun həm diaqnostika, həm də müalicə məqsədilə rolu çox böyükdür. Şişin düzgün diaqnozunun qoyulması, lokalizasiyasının müəyyən edilməsi və sonradan onun müalicəsi ilə məşğul olmaq çox incə bir işdir”.

Ulduz Vəliyevanın sözlərinə görə, uşaq orqanizmi böyüklərə nisbətən qat-qat həssasdır. Bu səbəbdən tətbiq edilən şüa terapiyası və ya digər metodlarda dozanın seçilməsi həyati əhəmiyyət kəsb edir:

“Şüa elə seçilməlidir ki, şişə təsir edib onu məhv etsin, lakin uşaq orqanizminə ziyan vurmasın. Kiçik bir səhv uşağın gələcək inkişafına mənfi təsir göstərə bilər”.

Onkoloq xüsusilə vurğulayıb ki, uşaq radioloqu yetişdirmək həm uzun zaman, həm də böyük maddi-mənəvi güc tələb edir. Bu səbəbdən nəinki Azərbaycanda, bütün dünyada bu cür mütəxəssislərin sayı olduqca azdır:

“Hər mütəxəssis bunu bacarmır. Bu iş çoxlu maddi, mənəvi və psixoloji güc tələb edir. Ona görə də uşaq onkologiyasında radioloqun rolu əvəzsizdir”.

Əgər yayılan iddialar doğrudursa və Asif Nəsirli həqiqətən də ölkədə bu işi görən tək mütəxəssis idisə, bu itki uşaqların müalicəsində ciddi fəsadlar yarada bilər. Mövzu ilə bağlı rəsmi qurumların açıqlamasını gözləyirik. 

Çimnaz Telmanqızı

Həmçinin oxuyun

Kimlər 20 il tez pensiyaya çıxacaq? - Bu aydan etibarən...

Hərbçimiz ailə üzvləri ilə birgə yol qəzasında həlak oldu 

Rus bölməsində təhsilin üstünlüyü reallıqdır, yoxsa mif? – Təhsil ekspertindən ANALİZ  

Azərbaycanda tanınmış şəxs vəfat etdi