Laborantlıqdan Baş nazirə kimi YÜKSƏLDİ - 70 yaşlı Əli Əsədovun DOSYESİ

CƏMİYYƏT

15455

17.04.2026, 23:07

Bu gün yerli mediada Azərbaycan Respublikasının Baş naziri Əli Əsədovun şirkətləri,obyektləri barədə yazılar yer aldı.

Bunun ardınca bir neçə saytda baş naziri tənqid edən məqalələr yer aldı.Bütün bunlar yaşı 70-ə çatan baş nazirin postu ilə vidalaşacağı ehtimalını gücləndirir.

Bəs,bir gündə medianın tənqidinə məruz qalan Əli Əsədov kimdir?

Oxu24.com xəbər verir ki,Əli Hidayət oğlu Əsədov 1956-cı il noyabrın 30-da Bakı şəhərində anadan olub, 1964-1974-cü illərdə Bakı şəhərində 134 nömrəli məktəbdə təhsil alıb.

1974-cü ildə Moskva şəhərində Plexanov adına Xalq Təsərrüfatı İnstitutuna daxil olub və 1978-ci ildə həmin İnstitutu bitirib.

1978-ci ildə Azərbaycan SSR Elmlər Akademiyasının İqtisadiyyat İnstitutunda baş laborant kimi çalışıb.

1978-1980-ci illərdə ordu sıralarında xidmət edib.

1980-ci ildə yenidən Azərbaycan SSR Elmlər Akademiyasının İqtisadiyyat İnstitutuna qayıdaraq, 1981-ci ilədək baş laborant kimi fəaliyyətini davam etdirib.

1981-1984-cü illərdə Moskva şəhərində SSRİ Elmlər Akademiyası İqtisadiyyat İnstitutunda aspirant olub, 1985-ci ildə namizədlik dissertasiyasını müdafiə edərək, iqtisad elmləri namizədi elmi dərəcəsini alıb.

1985-1989-cu illərdə isə Azərbaycan SSR Elmlər Akademiyasının İqtisadiyyat İnstitutunda kiçik elmi işçi və elmi işçi kimi fəaliyyət göstərib.

1989-cu ildən pedaqoji fəaliyyətə başlayıb və 1995-ci ilədək Bakı Sosial İdarəetmə və Politologiya İnstitutunda dosent və kafedra müdiri kimi çalışıb.

1995-2000-ci illərdə Birinci çağırış Azərbaycan Respublikası Milli Məclisinin deputatı olub.

1998-ci il aprelin 17-də Azərbaycan Respublikası Prezidentinin iqtisadi məsələlər üzrə köməkçisi təyin edilib.

2012-ci il 29 noyabr tarixində Azərbaycan Respublikası Prezidentinin Administrasiyası rəhbərinin müavini təyin olunub.

2017-ci ildən Azərbaycan Respublikası Prezidentinin iqtisadi məsələlər üzrə köməkçisi-şöbə müdiri kimi çalışıb.

Azərbaycan Respublikası Prezidentinin 2019-cu il 8 oktyabr tarixli Sərəncamı ilə Azərbaycan Respublikasının Baş Naziri təyin edilib.

Azərbaycan Respublikası Prezidentinin 2024-cü il 16 fevral tarixli Sərəncamı ilə yenidən Azərbaycan Respublikasının Baş naziri təyin edilib.

1993-cü ilin fevralında Yeni Azərbaycan Partiyasına daxil olub, YAP-ın Siyasi Şurasının üzvüdür.

Təltiflər:

2-ci dərəcəli “Vətənə xidmətə görə” ordeni (2012-ci il)

1-ci dərəcəli “Vətənə xidmətə görə” ordeni (2016-cı il)

Ailəlidir, iki övladı var.

Oğlu Hidayət Əsədov Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin preventiv tədbirlər və təhqiqat idarəsinin rəis müavinidir,baş ədliyyə müşaviri rütbəsini daşıyır.

Jalə

Həmçinin oxuyun