Rəşad Xalıqov şöbə müdiri təyin EDİLDİ 

İnnovasiya və Rəqəmsal İnkişaf Agentliyi İdarə Heyətinin sədr müavini Rəşad Xalıqov vəzifəsindən azad olunub. O, rəqəmsal inkişaf və nəqliyyat nazirinin əmri ilə Nazirliyin rəqəmsal inkişaf və innovasiya şöbəsinin müdiri təyin edilib.

Oxu24.com bildirir ki, bu barədə Azərbaycan İnternet Formunun Prezidenti, ekspert Osman Gündüz sosial media hesabında paylaşım edib.

Ekspert bildirib ki, Yeni təyinat formal olaraq "şöbə müdiri" kimi səslənsə də, mahiyyət və səlahiyyət baxımından daha üstün statusa malikdir. Sözügedən struktur bölmə nazirliyin daxilində və strukturuna daxil olmayan tabeli qurumlarda rəqəmsal inkişaf və innovasiyalar üzrə siyasətin hazırlanması, koordinasiyası və icrasına cavabdeh olan strateji mərkəz rolunu oynayır:

"Bu şöbə rəqəmsal transformasiya, kibertəhlükəsizlik, internet idarəçiliyi və fərdi məlumatların mühafizəsi üzrə siyasətin formalaşdırılmasında, eləcə də süni intellekt, data idarəçiliyi və oxşar istiqamətlərdə fəaliyyətin əlaqələndirilməsində iştirak edir.

Xatırladıram ki, bir neçə gün öncə Prezidentin sədrliyi ilə "Azərbaycanın yeni rəqəmsal arxitekturası" mövzusunda keçirilən müşavirədə sektor üzrə vahid fəaliyyət planı təqdim olunmuşdu. Dövlət başçısının süni intellekt, data infrastrukturu və mərkəzləşdirilmiş vahid rəqəmsal idarəetmə ilə bağlı mesajları göstərdi ki, sektorda artıq yeni mərhələ başlayır.

Bu kontekstdə kadr dəyişikliyini sırf vəzifə dəyişikliyi kimi yox, daha çox koordinasiyanın gücləndirilməsi və mərkəzi idarəetmənin sərtləşdirilməsi addımı kimi qiymətləndirmək olar".

Osman Gündüzün sözlərinə görə, son illərdə İRİA-da məhz Rəşad Xalıqovun kurasiya etdiyi rəqəmsal hökumət və transformasiya istiqamətində, o cümlədən myGov ekosistemi çərçivəsində müəyyən görünən müsbət nəticələr əldə olunmuşdu. Eyni zamanda startap və innovasiya blokunda problemlərin qalması da sirr deyil:

"Bu baxımdan indiki təyinat əsas diqqətin rəqəmsal sektorun vahid arxitektura əsasında yenidən qurulmasına yönəldiyini göstərir.

Nazir Rəşad Nəbiyevin bu qərarını uğurlu hesab etmək olar. Düşünürəm ki bu təyinatın məntiqi də ondan ibarətdir ki, yeni çağırışlar fonunda koordinasiya və siyasət səviyyəsində daha güclü idarəetmə qurulsun.

Ümid etmək olar ki, bu təyinat rəqəmsal transformasiya və süni intellekt sahəsində daha sistemli dönüşə səbəb olacaq".musavat.com

Həmçinin oxuyun

Pensiyalarla bağlı RƏSMİ AÇIQLAMA

Bu təqaüdlər artırılır?   — Ekspert AÇIQLADI

100 manat - 3 bal dəyərində cəriməsi var   —  SÜRÜCÜLƏRƏ XƏBƏRDARLIQ

Milli Məclis mühüm qərarlar qəbul edib