Psixiatrik dərmanlar ömürlükdür? – Mütəxəssis AÇIQLADI   

Cəmiyyətdə psixiatrik müalicələr və qəbul edilən dərmanlarla bağlı ən çox yayılan qorxulardan biri də bu preparatların ömürlük istifadə edilməsi məcburiyyətidir. Bir çox insan "psixiatra getsəm, ömrümün sonuna qədər dərman asılılığım olar" düşüncəsi ilə mütəxəssis qəbuluna yazılmaqdan çəkinir.

Bəs reallıq necədir? Psixiatrik dərmanlar həqiqətənmi ömürlük istifadə olunmalıdır?

Bu barədə Oxu24.com-a açıqlamasında psixiatr-psixoterapevt Dr. Nigar Arif-Poladlı aydınlıq gətirib.

“Psixiatrik dərmanlar ömürlük deyil"

Mütəxəssis bildirib ki, psixiatrlar psixoloji və psixiatrik problemlər üçün dərman təyin edə bilən yeganə psixi sağlamlıq mütəxəssisləridir. Lakin onların yazdıqları hər bir dərmanın ömür boyu istifadə ediləcəyi fikri tamamilə yanlışdır:“Verilən bütün dərmanlar ömürlük deyil. Psixiatrik problemlər üçün müalicə olunan xəstələrin əksəriyyəti zaman keçdikcə dərmanlarını kəsir və ya vəziyyətləri yaxşılaşdıqca dərmanı daha az dozada istifadə edirlər”.

“Ömür boyu dərman qəbul edən xəstələr azlıq təşkil edir”

Dr. Nigar Arif-Poladlı bəzi xəstələrin uzun müddət, hətta ömür boyu dərman qəbul etmək məcburiyyətində qala biləcəyini də istisna etməyib. Lakin o, bu kateqoriyaya aid olan pasiyentlərin ümumi xəstə sayının çox az hissəsini təşkil etdiyini vurğulayıb:

“Bəzi xəstələr isə uzun müddət, hətta ömür boyu dərman qəbul etməli ola bilərlər. Lakin bu xəstələr psixiatrların gördüyü, müalicə etdiyi pasiyentlərin daha az hissəsini təşkil edir”.

Psixoterapevt cəmiyyətdə normal qarşılanan bəzi xroniki fiziki xəstəlikləri nümunə gətirərək, psixiatrik xəstəliklərin də analoji yanaşma tələb edə bildiyini diqqətə çatdırıb:“Unutmayın ki, bəzi fiziki xəstəliklər olan – məsələn, şəkərli diabet, arterial hipertenziya (yüksək qan təzyiqi) da ömür boyu dərman qəbulunu tələb edir”.

Mütəxəssisin sözlərindən belə aydın olur ki, psixiatrik müalicədə əsas məqsəd xəstənin həyat keyfiyyətini bərpa etməkdir və sağalma tendensiyası müşahidə olunduqca, həkim nəzarəti altında dozalar azaldılır, yaxud tamamilə dayandırılır. Bu səbəbdən psixi sağlamlıqla bağlı problemlər zamanı vaxtında mütəxəssisə müraciət etməkdən qorxmaq lazım deyil.

Çimnaz Telmanqızı

Həmçinin oxuyun

SON DƏQİQƏ! Seyfəddin Rəhimov dünyasını dəyişib

Arzum bu halda azadlığa çıxa bilər - Vəkil açıqladı 

Vida mərasimində Azərbaycana mesaj: 139-cu ayə ilə nəyə eyham vuruldu? 

“Uzundərə" hədəfdədir: Erməni saxtakarlığı və elmi həqiqətlərin qarşıdurması — “Oxu24.com"un ARAŞDIRMASI