İbadət Məhərəmovun “xəstə balaları”nın işini Hərbi Pokurorluq araşdıracaq

Şəmkirli iş adamı, sabiq prokurorluq  işçisi İbadət Məhərrəmovla Ağstafa rayonu, Köçəsgər  kənd sakini  Mehman  Məmmədov  arasındakı  çəkişmə get-gedə daha da dərinləşməkdə  davam  edir.

Oxu24.com CityPost.az saytına istinadən  xəbər verir  ki,M.Məmmədovun  iddiasına  görə,İ.Məhərrəmov  onun  həbsdə  olan oğlunun azadlığa  çıxması üçün  58  min  manat və 4500 ABŞ dolları  məbləğində  pulunu ələ keçirib və bunun müqabilində oğluna heç bir hüquqi və mənəvi yardım göstərməyib.  Nəticədə  aldadıldığını  başa  düşən M.Məmmədov  verdiyi pulları geri tələb etsə də,İ.Məhərrəmov onun israrlı tələblərini qulaq ardına vurub. Əlacsız qalan M.Məmmədov İ.Məhərrəmovun qanunsuz hərəkətlərindən və özbaşnalığından hüquq-mühafizə orqanlarına şikayət edib. 

M.Məmmədovun şikayəti  hazırda  Baş Prokuror yanında Korrupsiyaya qarşı Mübarizə Baş İdarəsində araşdırılır. İşin istintaqı xüsusilə mühüm  işlər üzrə müstəntiq Azər Kazımova həvalə edilib. İbadət Məhərrəmovun oğlanları Yamin,Ramin və Əli Məhərrəmovlar atalarından etdiyi şikayəti geri götürməyi Mehman Məmmədovdan  tələb etmiş, hətta Mehman Məmmədova hədə-qorxu gələrək ona xəsarət yetirəcəklərini  bildiriblər. Məhz, bu səbəbdən M.Məmmədov onların hərbi xidmətdən yayınmalarına dair müxtəlif instansiyalara müraciət edərək məsələni sosial şəbəkələrdə  ictimailəşdirib. 

M.Məmmədovun şikayət ərizəsi Səfərbərlik və Hərbi Xidmətə Çağırış Üzrə Dövlət Xidmətində və Şəmkir Hərbi Prokurorluğunda araşdırılıb.

 

Araşdırma nəticəsində  İ.Məhərrəmovun oğlanlarının müxtəlif xəsətliklərdən əziyyət çəkdikləri üçün hərbi xidmətə yarasız olduqları ortaya çıxıb. Qərardan  narazı qalan Mehman Məmmədov məsələnin Respublika Hərbi Prokurorluğunda araşdırılmasından ötrü  Azərbaycan Respublikasının Hərbi prokuroru, Ədliyyə general-leytenantı  Xanlar  Vəliyevə  müraciət  ünvanlayıb:
   
“Məhərrəmov qardaşlarının heç bir ciddi xəstəlik daşıyıcısı olmadıqlarına tam əminəm.Onlar rayonda atalarına məxsus ayrı-ayrı böyük ticarət obyektlərini idarə edirlər. Xəstə adamlar belə ağır məsuliyyətin altına girə bilməzdilər axı.. İdmançı cüssəli  qardaşlar hər üçü  sadəcə xidmətdən yayınmaqdan ötrü nəyinsə hesabıma saxta  tibbi ekspertiziya  rəyləri ala  biliblər. Əgər onlar həqiqətən xəstədirlərsə,nə üçün pensiya almırlar? Onlara verilmiş xəstəlik tarixçəsi komission qaydada nəzarətiniz altında araşdırılsa hər şey tez bir zamanda aydınlaşasacaq, mənim dediklərim yerini tutacaq.

Şəmkir Hərbi Prokuroru  ədliyyə  polkovnik- leytenantı  İlham Babayev  tərəfindən  çıxarılmış 23 sentyabr  2024-cü il tarixli qərarı  hüquqa zidd  və  qanunsuz hesab edirəm. Odur ki,Azərbaycan Respublikasının Cinayət-Prosessual Məcəlləsinin 212.3-cü maddəsinə  əsasən  cinayət işinin  başlanmasının rədd edilməsi haqqında müvafiq qərarın yenidən Azərbaycan Respublikası Hərbi Prokurorluğunda nəzarətiniz altında  araşdırılmasına  göstəriş  verməyinizi, Sizdən xahiş edirəm.”, deyə M.Məmmədov müraciətində qeyd edib.