Azərbaycan Bayrağı haqqında məşhur şeiri o yazıbmış  - MÜƏLLİFLƏ MÜSAHİBƏ

Bu gün Azərbaycan xalqının milli simvolu – üçrəngli bayrağımızın şərəf və qürur günü qeyd olunur. Bayraq təkcə simvol deyil, o, tariximizin, mübarizəmizin və şəhidlərimizin qanı ilə yoğrulmuş mənəvi bir dəyərdir. Hər bir rəngi xalqımızın azadlıq və vətənpərvərlik ruhunu, hər dalğalanışı isə birlik və sadiqliyi simvolizə edir.

Bayraq Günü, yalnız dövlət rəmzimizə hörmətin ifadəsi deyil, həm də millətimizin birliyinə, iradəsinə və gələcəyə olan ümidinə həsr olunmuş əziz gündür. 

Hər bir şair, qələm sahibi üçün vətənini, torpağını, elini, bayrağını vəsf etməkdən, onlara şeir həsr etməkdən daha böyük qürur ola bilməz. 

Bir çox məşhur sənətçilərin,qiraətçilərin,şairlərin səsləndirdiyi "Ey Sevgili Bayrağım!" şeirinin müəllifi şair  Şəmsi Vəfadar  Oxu24.com-a əsərin yaranması tarixçəsindən danışıb.

"Azərbaycan bayrağını harada dalğalanan görsəm, özümə hakim ola bilmirəm, qürur hissi ürəyimə dolur və kövrəlirəm. Mənim üçün o rənglər, xüsusilə qırmızı, şəhidlərimizin qanını xatırladır. Hər dəfə bayrağın yüksəlişini görəndə düşünürəm ki, bu ucalış üçün canını fəda edən oğullar və dua edən analar var.

Tələbə ikən, 1988-ci illərdə, insanlar Azərbaycan bayrağını çox vaxt tanımırdılar, soruşurdular: “Bu haranın bayrağıdır?” Sonralar isə hamı öyrəndi və onu tanıdı. Mən jurnalist kimi Elmlər Akademiyasının elmi qəzetində işləyəndə Ziya Bünyadovun kabinetində həm sovet bayrağı, həm də Azərbaycan bayrağının birlikdə olduğunu görmüşdüm. Belə vətənpərvər insanlar çox idi.

Həmçinin oxuyun

Prezidentdən deputatın oğlu ilə bağlı SƏRƏNCAM 

Eyyubovlardan sonra növbə kimindir?

Yuxu dərmanı atıb yatanlara VACİB XƏBƏR 

Putin buna görə Əliyevdən üzr istəyib — RUSİYANIN AÇIQLAMASI

O dövrdə bayraq istehsalı kütləvi deyildi. Bəzi insanlar isə öz evlərində əl ilə bayraq tikirdilər. Yadımdadır ki, Ramiz adlı bir müəllimim vardı; İsmayıllının Baskallı kəndindən idi. Qarajında xüsusi bir yer düzəltmişdi və orada insanlar təmənnasız olaraq bayraqlar tikir, onları idarələrə və müəssisələrə paylayırdılar.O illəri canlı yaşayan bir insan  kimi məndə hisslər  formalaşdı.Elə zəmanənin tələbinə uyğun olaraq  bu gün  hər kəs tərəfindən sevilən  “Ey sevgili bayrağım!” şeirini  yazdım. Bu,baş verən təbii proseslər  zamanı  ortaya çıxan  bir şeir oldu.Daha sonra  bəstəkar Tamilla  Əhmədova bu şeirə musiqi bəstələdi. İstedadlı müğənnimiz   Aynur İskəndərli  bu musiqini  özünə məxsus şəkildə ifa etdi.Bununla da şeirin musiqi ilə birlikdə yeni məşhurluq dönəmi başladı.Bayraq haqqında şeir hər zaman aktualdır.Müəllifi olduğum şeiri  kimlərinsə ifasında eşidəndə qürur duyuram.Çünki orada Azərbaycan Bayrağı ifadəsi var",-deyə Şəmsi Vəfadar bildirib.

Pərvanə Əsədova