Avtomobilin səs boğucunun səsi neçə desibel olmalıdır? — Vəkil 150 manatlıq cərimə şərtlərini açıqladı

İQTİSADİYYAT

29.07.2026, 18:05

Ölkəmizdə sürücüləri ən çox maraqlandıran və tez-tez mübahisələrə səbəb olan məsələlərdən biri avtomobillərin səsboğucu (qruşitel) sistemindən çıxan səsin maksimum həddidir. Bir çox avtomobil sahibi mühərrikin və ya səsboğucunun neçə desibelə qədər səs çıxarmasının qanuni olduğunu, hansı hallarda məsuliyyət yarandığını dəqiq bilmir. Əslində, nəqliyyat vasitələrinin səs-küy səviyyəsi həm beynəlxalq standartlar, həm də yerli qanunvericiliklə dəqiq tənzimlənir. Yollarda nəzarətin gücləndirildiyi bir vaxtda müəyyən olunmuş normanı keçən avtomobil sahiblərini ciddi sanksiyalar gözləyir. Normadan artıq səs yayan nəqliyyat vasitələri hüquqi müstəvidə nəinki cərimələnir, hətta cərimə meydançasına da aparıla bilər. Məsələ ilə bağlı qanunvericiliyin tələblərini və icazə verilən desibel həddini bilmək hər bir sürücü üçün böyük əhəmiyyət kəsb edir.

Mövzu ilə bağlı Oxu24.com-a açıqlama verən vəkil Turan Abdullazadə avtomobillərdə icazə verilən səs həddi, beynəlxalq normalar və tətbiq olunan cərimələr barədə ətraflı məlumat verib:

"Birləşmiş Millətlər Təşkilatının (BMT) Avropa İqtisadi Komissiyasının müvafiq qaydalarına əsasən, M1 kateqoriyalı avtomobillər üçün maksimum səs-küy səviyyəsi 73-75 desibel (dB) aralığında ola bilər. Ümumdünya Səhiyyə Təşkilatının (ÜST) rəsmi məlumatına görə isə 85 desibeldən yuxarı səsə məruz qalmaq insanda eşitmə qüsuruna səbəb olur. Buradan belə bir nəticəyə gəlmək olar ki, 85 desibelə qədər olan səs nisbətən güvənli sayıla bilər”.

Onun sözlərinə görə, bəzi mənbələrdə Azərbaycanda səs standartlarına dair QOST 2006 standartının tətbiq olunduğu və burada M1 kateqoriyalı avtomobillər üçün maksimum həddin 96 desibel gösterildiyi qeyd edilir. Lakin bu standartı tətbiq etsəniz, cərimələnə bilərsiniz. Çünki 96 desibel həm ÜST-ün normativlərindən artıqdır, həm də Standartlaşdırma, Metrologiya və Patent üzrə Dövlət Komitəsinin Standartlaşdırma İnstitutunun rəsmi cavabına əsasən, Azərbaycan Respublikasında icazə verilən səs hədlərinin norması 75 desibeldir.

Sürücülər hansı halda cərimələnə bilər?

T.Abdullazadə qeyd edib ki, yekun olaraq məsələni belə qruplaşdıra bilərik:

•75 desibelə qədər: Avtomobilinizin səsboğucusundan çıxan səs 75 desibelə qədərdir, sizi heç kim cərimələyə bilməz və hər hansı problem yaşamayacaqsınız.

•75 – 84 desibel arası: Bu aralıq mübahisələndirilə bilən hissədir. Əgər bu göstəriciyə görə cərimə olunsanız, məsələni məhkəmə qaydasında mübahisələndirmək şansınız var.

•85 desibel və daha yuxarı: Səs səviyyəsi 85 desibeli keçdikdən sonra artıq qanunsuzluq hesab olunur. Bu halda avtomobiliniz mütləq qaydada cərimə meydançasına yerləşdiriləcək və siz 150 manat məbləğində cərimə olunacaqsınız. Bu göstəricidən yuxarı səsə görə cərimə tətbiq edilməsi tamamilə qanuni və ədalətlidir”.

Çimnaz Telmanqızı

Həmçinin oxuyun