Bakıda hava qəfil dəyişir? – Gözlənilən leysanla bağlı açıqlama 

Bir neçə gün əvvəl Bakıda güclü yağış və leysan gözlənildiyi üçün paytaxtda hazırlıq işləri görülür, yeraltı keçidlərin girişlərinə qum kisələri düzülürdü. Lakin gözlənilən yağıntılar baş vermədi və görülən tədbirlər müzakirə mövzusuna çevrildi.

Hava proqnozları niyə bəzən özünü doğrultmur? Hazırda yaz havası hiss olunur, bu, “fırtına öncəsi səssizlik” ola bilərmi? Bizi həqiqətən leysanlar gözləyirmi?

Oxu24.com  xəbər verir ki, Globalinfo.az-a danışan biomüxtəliflik üzrə ekspert, ekoloq Arzu Mustafayev deyib ki, hər şeydən əvvəl, bu, bir proqnozdur:

“Yəni ehtimalı yüksək olan hava şəraiti barədə məlumatlandırma mexanizmidir. 50 il əvvəl elm, texnika indiki dövrlə müqayisədə dəfələrlə zəif idi və proqnozların dəqiqlik ehtimalı daha aşağı idi. Lakin bu gün kompüterlər, süni intellekt, avtomatlaşdırılmış stansiyalar vasitəsilə daxil olan məlumatların emalı və proqnozların hazırlanmasında tamamilə yeni texnoloji yanaşmalar və müasir üsullar tətbiq olunur. Buna baxmayaraq, son proqnozların özünü doğrultmaması göstərir ki, bir çox sahələrdə olduğu kimi, bu sahədə də mütəxəssis və peşəkar təşkilatların strukturunun optimallaşdırılmasına böyük ehtiyac var. Mütəxəssis qıtlığı və peşəkarlıq səviyyəsinin mövcud vəziyyəti də öz mənfi təsirini göstərir. Bu problem məhz həmin amillərlə əlaqəlidir”.

Ekoloq bildirib ki, hazırda Bakıda, o cümlədən nisbətən hündür ərazidə yerləşən Yasamalda havanın temperaturu 20 dərəcədir:

“Bu, payız mövsümü üçün orta maksimum temperatur hesab olunur. Payız fəsli yağıntı, yağmur, külək və çiskinlə yanaşı, belə temperaturlarla da müşayiət edilə bilər. Buna görə də mövcud hava şəraitini həm anomaliya, həm də payızın mülayim havası kimi qiymətləndirmək olar. Payızın ölkəmizdə başlamasından cəmi 20 gün keçib. Bu səbəbdən mövcud vəziyyəti hansısa “fırtına öncəsi sakitlik” kimi dəyərləndirərək vətəndaşları narahat etməyə ehtiyac yoxdur.

Payız özünəməxsus xüsusiyyətlərini təbii şəkildə göstərir. Havanın bu cür keçməsi insan həyat tərzi, ekologiya və kənd təsərrüfatı baxımından normaldır. Bu hava şəraitinin yaratdığı imkanlardan müsbət mənada istifadə etməliyik. Ümid edək ki, yaxın günlərdə dəhşətli fırtına, çovğun və ya güclü sel kimi təhlükəli hava hadisələri ilə qarşılaşmayacağıq”.

Həmçinin oxuyun

Azərbaycanda koronavirus  təhlükəsi varmı? - HƏKİM DANIŞIR

Trampın Əliyevi  ABŞ-yə dəvəti Azərbaycana nə verəcək?  —  SİYASİ ŞƏRH

Azərbaycan milyonlarla gəlir qazanacaq - AÇIQLAMA

 Elm və Təhsil Nazirliyi yeni təyinatla bağlı MƏLUMAT YAYDI