Bakıya axın başlayıb – Kəndlər boşalır, əhali..  

“Yəqin ki, mətbuatda tez-tez, “filan ölkədə 1 avroya, 1 dollara evlər satılır” xəbərlərini görmüsünüz. Ən son belə xəbər İtaliyanın Siciliya adasındakı tarixi Naro şəhəri tərk edilmiş evləri cəmi 1 avroya satışa çıxararaq yeni sakinlər cəlbi cəhdi haqqında olub”.

Oxu24.com  Globalinfo.az-a istinadən xəbər verir ki, bunu iqtisadçı Natiq Cəfərli qeyd edib.

Onun sözlərinə görə, bir avroluq (təxminən 2 manat) evlər həm İtaliya vətəndaşları, həm də xaricilər üçün əlçatandır:

“Siyahıya alınan əmlakların böyük hissəsi təmirə ehtiyacı olan və bəzilərində ciddi bərpa işləri tələb edilən evlərdir. Buna görə alıcı evin təmir və yenidənqurma xərclərini özü qarşılamalıdır.

Bəs bu evləri niyə 1 avroya satırlar? Səbəbi odur ki, dünyanın müxtəlif ölkələrində kiçik kəndlər, qəsəbələr sürətlə boşalır, əhali böyük şəhərlərə köçür, aqrar sahədə çalışmaq istəyənlərin sayı azalır. Ona görə də dövlət belə proqramlar qəbul edir: şəhərlərdən kəndə, qəsəbəyə köçənlərə güzəştlər verir, faizsiz kreditlər təklif edir, kommunal xidmətlərə qoşulmaq, bərpa olunan enerji mənbələrinə keçid üçün köməklik göstərir”.

Ekspert qeyd edib ki, artıq Azərbaycanda da bu proses başlayıb:

“Kəndlər boşalır, əhali, əsasən, Bakıya axır. Bunun səbəbləri çoxdur, bir tək iqtisadi səbəb, maddi vəziyyət deyil – kəndlər, qəsəbələrdə, hətta rayonlarda mədəni həyat, əyləncə yoxdur, bizneslə məşğul olmaq üçün şərait zəifdir.

Biz dövlət və cəmiyyət olaraq şəhərdən kəndə, qəsəbəyə köçmək istəyən insanlara özəl münasibət göstərməliyik. Kəndlərdə yaşayanlar, orda çalışanlar kommunal xidmətlərə şəhərə nisbətən 2 dəfə az ödəniş etməlidir. İstehsal sahəsi yaratmaq istəyənin bütün texniki şərtləri, kommunal xidmətlərə qoşulması pulsuz olmalıdır.

Məcburuq ki, 15-20 il əvvəli düşünək, bu gün addımlar ataq ki, 15-20 ildən sonra boşalmış kəndlər, rayonlar görməyək, əti, aqrar məhsulları Gürcüstandan, Ermənistandan almağa məcbur qalmayaq. Bu gün ölkə əhalisinin yarısına yaxını Abşeronda yaşayır. Belə getsə, 20 ildən sonra bu rəqəm 80%-ə çatacaq”.

Həmçinin oxuyun

İşləyən şəxslərə VACİB XƏBƏR: Məzuniyyət belə veriləcək

Məktəbli faciəli şəkildə həyatını itirdi  - FOTO

5 oktyabrda bu bürclərə uğurlu olacaq   —  ULDUZ FALI

10 gün ərzində qeydiyyata düşməyənləri CƏRİMƏ GÖZLƏYİR – Hüquqşünas açıqladı