"...AH... BİR OYANA BİLSƏYDİM HƏR SABAH..."

Yaşasaydı bu gün 80 yaşı olacaqdı Tofiq Abdinin... Bizim Tofiq abinin. Təəssüf ki, 70 yaşından sonrakı

yubileylərini görmək əziz dostumuza qismət olmadı.

Tofiq Abdin bənzərsiz şair, publisist idi. Adi insan kimi də hamıdan fəqrlənirdi. Bəzən bu qəribəliyi başa düşülməsə də. Gündəlik həyat tərzində, geyimində, ətrafdakılarla münasibətində öz qaydaları var idi və bu qaydaları heç vaxt dəyişmirdi. 

O qədər qəribə idi ki, doğulduğu günü də dəqiq bilmirdi. Əslində sentyabrın ilk gününü dünyaya gəlişinin simvolik tarixi kimi götürməyə məcbur olmuşdu. Neftçalanın Qırmızıkənd kəndindəki orta məktəbin yuxarı sinifində komsomola keçəndə doğum gününü sentyabrın 1-nə qeyd etmişdilər. Çünki  həmin vaxta kimi sənədlərində doğum günü qrafası boş imiş.

Həyatının İstanbul dövrü başa çatandan sonra Bakıya qayıdınca məni axtarıb tapdı. Çalışdığım redaksiyaya zəng vurub köşələrimi Türkiyədə  maraqla izlədiyini, görüşmək istədiyini dedi. Həmin zəngə qədər təbii ki, mən Tofiq Abdini qiyabi tanıyırdım. İmzası məşhur idi, "Qobustan" jurnalında, "525-ci qəzet"də yazılarını dönə-dönə oxumuşdum. Ümumi dostlardan Tofiq Abdin haqqında xoş sözlər eşitmişdim.

90-cı illərin sonlarından ömrünün sonuna -2014-cü il fevralın 25-nə kimi Tofiq abi ilə saysız-hesabsız görüşlərimiz, söhbətlərimiz oldu. "Ədalət" qəzetində haqqımda böyük bir yazı yazdı. Mənim də Tofiq Abdinlə müsahibələrim, köçələrim oldu.

Çalışdığı Mədəniyyət Nazirliyində, Tərcümə Mərkəzində, "Qobustan" jurnalının Yazıçılar Birliyindəki redaksiyasında,  metronun "Qara Qarayev" stansiyası səmtindəki sadə mənzilində görüşürdük.  O evdə kimlər qonaq olmamışdı...

Tofiq abinin məclisləri də başqa yığıncaqlara bənzəmirdi, söz-söhbətindən, zarafatlarından doymaq olmurdu Tofiq abinin.  Hər zaman gənc yazı-pozu adamlarıını ətrafına toplayırdı. Yaşıdlarından isə Maarif Soltan, Aslan Quliyev,  Tofiq Nurəli ilə oturub-durmağı xoşlayırdı. 

Tofiq Abdinin 70 illik yubileyi də qəribə oldu. Dedi  ki, bütün dostları yığıb qonaqlıq verməyə gücüm çatmır, iki-bir, üç-bir dəvət edəcəm oturub qeyd edərik. Dediyi kimi də elədi və bir də gördük  il başa çatır, amma Tofiq Abinin yubiley məclisləri hələ davam edir.

Sonrakı yubileylər Tofiq Abdinsiz keçir. Elə 80 illiyi də. 

Əvəzolunmaz və bənzərsiz Tofiq Abdini, dostların Tofiq Abisini onun öz misraları ilə yad edirəm:

           Öləndən sonra 

           çox demirəm, 

           bir azacıq üşüyə bilsəydim 

           qışda.

           canım bir azcıq isinsəydi

           yayda

           öləndən sonra darıxmaya bilsəydim

           o tənhalıqda.

           ah... bir oyana bilsəydim 

           hər sabah

          oyandığım kimi danüzü

          gəlib öpə bilsəydim

          balalarımın üzündən

          ruhum bir duman olub

          keçsəydi Muğan düzündən

          oyana bilsəydim 

          bir daha ölməzdim düşünürəm.

Etibar Cəbrayıloğlu yazır

Həmçinin oxuyun

TƏCİLİ! Avtomobil aşaraq yanıb, ölən və xəsarət alan var

Coşqun və Ucalın ölümünün şok detalları:200-300 metr aralı olublar -VİDEO

Bu şəxslərə əmək pensiyası xüsusi qaydada təyin olunur – AÇIQLAMA 

Qadınların 55 yaşında pensiyaya çıxması ilə bağlı AÇIQLAMA