Həbsli avtomobildən istifadə etmək mümkündürmü? – Vəkil açıqladı

CƏMİYYƏT

356

18.08.2026, 15:55

Xəbərlərimizi Google-da izləyin

Yeniliklərdən dərhal xəbərdar olun

Borc öhdəliyinə görə məhkəmə qərarı əsasında avtomobilə həbs qoyulması avtomobil sahibinin həmin nəqliyyat vasitəsindən istifadə etmək hüququnun avtomatik olaraq tamamilə dayandırılması demək deyil. Belə hallarda əsas məsələ məhkəmə qərarında və icra sənədində avtomobilə hansı məhdudiyyətlərin tətbiq edildiyidir.

Vəkil Toğrul Allahyarov Oxu24.com-a açıqlamasında bildirib ki, nəqliyyat vasitəsinə həbs qoyulduğu halda, avtomobil hazırda vətəndaşın istifadəsindədirsə və ayrıca onun idarə olunmasına qadağa qoyulmayıbsa, şəxs həmin avtomobildən gündəlik istifadə edə bilər. Yəni avtomobilin üzərinə həbs qoyulması ilə onun sürülməsi arasında fərq var. Həbsin əsas nəticəsi, bir qayda olaraq, həmin əmlakın özgəninkiləşdirilməsi ilə bağlı məhdudiyyətlərin tətbiq edilməsidir.

Mütəxəssisin sözlərinə görə, icra prosesi çərçivəsində nəqliyyat vasitəsi ilə bağlı məlumatlar aidiyyəti dövlət qurumlarına göndərilə və avtomobilin satılması, bağışlanması, dəyişdirilməsi və digər formada özgəninkiləşdirilməsi məhdudlaşdırıla bilər. Bu halda avtomobil sahibinin həmin nəqliyyat vasitəsi üzərində sərbəst şəkildə sərəncam verməsi mümkün olmur.

Beləliklə, avtomobilə həbs qoyulması onun mütləq şəkildə sahibindən dərhal alınacağı anlamına gəlmir. Avtomobil müəyyən müddət ərzində şəxsin faktiki istifadəsində qala və o, nəqliyyat vasitəsini idarə edə bilər. Lakin bu müddətdə avtomobili satmaq, bağışlamaq və ya başqa şəxsin adına keçirmək mümkün deyil. Həbs qüvvədə olduğu müddətdə belə bir əqd bağlanması hüquqi problemlər yarada bilər.

Vəkil qeyd edib ki, xüsusilə avtomobilin üzərində məhkəmə və ya icra orqanının tətbiq etdiyi məhdudiyyət olduğu halda, vətəndaş həmin əmlakla bağlı hər hansı satış və ya digər sərəncam əməliyyatı həyata keçirməzdən əvvəl məhdudiyyətin aradan qaldırılıb-qaldırılmadığını dəqiqləşdirməlidir. Əks halda sonradan həmin əməliyyatın hüquqi qüvvəsi ilə bağlı mübahisələr yarana bilər.

İcra prosesinin davam etməsi halında isə avtomobil sonradan qiymətləndirilə bilər. Əgər borclunun borcunu könüllü şəkildə ödəməsi və ya tərəflər arasında başqa razılaşmanın əldə olunması mümkün olmazsa, qanunvericilikdə nəzərdə tutulmuş icra tədbirləri həyata keçirilə bilər. Bu mərhələdə nəqliyyat vasitəsinin dəyəri müəyyənləşdirildikdən sonra onun satılması və satışdan əldə olunan vəsaitin mövcud borcun ödənilməsinə yönəldilməsi gündəmə gələ bilər.

Toğrul Allahyarovun sözlərinə görə, buna görə də avtomobilinə uzun müddətdir həbs qoyulduğunu bildirən vətəndaş ilk növbədə icra işinin hansı mərhələdə olduğunu, avtomobil barəsində konkret hansı məhdudiyyətin tətbiq edildiyini və nəqliyyat vasitəsinin satışının hansı qaydada həyata keçirilə biləcəyini aidiyyəti icra qurumundan dəqiqləşdirməlidir.

Vəkil vurğulayıb ki, borcun mövcudluğu avtomatik olaraq şəxsin avtomobildən istifadə hüququnun itirilməsi demək deyil. Lakin məhkəmə qərarı və icra sənədi ilə əlavə məhdudiyyət müəyyən edilibsə, həmin məhdudiyyətlərə əməl olunmalıdır. Bu səbəbdən avtomobilə həbs qoyulmuş şəxslər nəqliyyat vasitəsinin hüquqi statusunu və icra işinin vəziyyətini əvvəlcədən dəqiqləşdirməlidirlər.

Həmçinin oxuyun