"Heç kim qəbul olunacağınıza zəmanət verə bilməz" - DİM sədri abituriyentlərə səsləndi

$\"Heç kim qəbul olunacağınıza zəmanət verə bilməz\" - DİM sədri abituriyentlərə səsləndi$

CƏMİYYƏT

297

17.08.2026, 13:15

Xəbərlərimizi Google-da izləyin

Yeniliklərdən dərhal xəbərdar olun

"Hazırda ixtisas seçimi mərhələsindəyik və hələ də seçim etməyən abituriyentlərlə bu proseslə bağlı bir neçə müşahidəmi bölüşmək istəyirəm. İlk tövsiyəm budur: ixtisas seçimi ilə bağlı ödənişli xidmət almağa tələsməyin".

Oxu24.com xəbər verir ki, bunu Dövlət İmtahan Mərkəzi (DİM) İdarə Heyətinin sədri Məleykə Abbaszadə sosial şəbəkə hesabında yazıb.

O qeyd edib ki, DİM-in Abituriyent Məsləhət Mərkəzlərində və səyyar xidmətlərində abituriyentlərə ödənişsiz dəstək göstərilir:

"Xidmətin ödənişsiz olması onun yalnız ümumi məlumat verməsi demək deyil. Əksinə, məsləhətlər hər bir abituriyentin nəticəsi, mövcud seçim imkanları və DİM-in rəsmi məlumat bazasında olan göstəricilər əsasında verilir.

Bu mərkəzlərdə çalışan əməkdaşlar ixtisas seçimi prosesini və qəbul mexanizmlərini yaxşı bilən, müvafiq məlumatlarla işləyən peşəkarlardır.

Elə buna görə də tövsiyəm budur ki, ilk növbədə rəsmi məsləhət xidmətindən yararlanın, yalnız bundan sonra əlavə dəstəyə ehtiyacınız olub-olmadığına qərar verin.

İxtisas seçiminə başlamazdan əvvəl isə özünüzə bu beş sualı verin:

- Mən, əslində, nə istəyirəm?

- Nəticəm mənə hansı seçimləri etməyə imkan verir?

- Bu ilin statistik göstəriciləri hansı ehtimalları göstərir?

- Seçimimin hansı məsuliyyətini öz üzərimə götürməyə hazıram?

- Əsas seçimim baş tutmasa, alternativim nədir?

Sizə ixtisas seçimi ilə bağlı məsləhət verən şəxs də bu sualların cavabını sizinlə birlikdə axtarmalıdır. Çünki ixtisas seçimi, sadəcə, "hara qəbul ola bilərəm?" sualından ibarət deyil. Burada abituriyentin istəyi, nəticəsi, real imkanları və alternativləri birlikdə nəzərə alınmalıdır".

Məleykə Abbaszadə vurğulayıb ki, heç kim abituriyentə müəyyən ixtisasa qəbul olunacağına zəmanət verə bilməz:

"Kimsə sizə "keçid balları ilə bağlı məndə xüsusi məlumat var", "nəticəni əvvəlcədən bilirəm" və ya buna bənzər vədlər verirsə, inanmayın. Qəbul prosesi ilə bağlı mövcud rəsmi məlumatlar açıqdır və hamı üçün əlçatandır.

Heç kimin əlində digərlərinin çıxışı olmayan "gizli keçid balı" və ya qəbul nəticəsini əvvəlcədən müəyyən edən məlumat yoxdur. Abituriyent Məsləhət Mərkəzlərinə təkcə ilk gün ərzində beş mindən çox müraciətin daxil olması da bu xidmətə olan ehtiyacı göstərir. İxtisas seçimi həyatınızın vacib qərarlarından biridir.

Bu qərarı qorxu, tələskənlik və ya zəmanət vədləri ilə deyil, rəsmi məlumat, düzgün təhlil və öz istəyinizi nəzərə alaraq verin. Əvvəlcə etibarlı və rəsmi mənbədən yararlanın. Ehtiyac qalarsa, bundan sonra digər seçimləri dəyərləndirə bilərsiniz".

Həmçinin oxuyun