Tanınmış professor 95 yaşında VƏFAT ETDİ 

Türkiyədə İnönü Universitetinin keçmiş rektoru, professor Ömər Şarlak 95 yaşında Ankarada vəfat edib.

Oxu24.com  xəbər verir ki, təqaüdçü general-mayor olan Şarlak yaşla bağlı xəstəliklər səbəbindən 13 avqust 2026-cı ildə dünyasını dəyişib.

O, 1996-2000-ci illərdə İnönü Universitetinin rektoru vəzifəsində çalışıb.

Mərhumun dəfn mərasimi avqustun 14-də cümə günü əsr namazından sonra Ankaradakı Əhməd Həmdi Akseki məscidində keçirilib. Ömər Şarlak Cebeci Əsri qəbiristanlığında torpağa tapşırılıb.

Ömər Şarlak kim olub?

1931-ci ildə Konya vilayətinin Akşehir rayonunda anadan olan Ömər Şarlak ibtidai və orta təhsilini Akşehirdə, lisey təhsilini isə Afyon Liseyində alıb. 1955-ci ildə Ankara Universitetinin Tibb Fakültəsini tibb leytenantı kimi bitirib.

1960-cı ildə Gülhane Hərbi Tibb Akademiyasında Ümumi Cərrahiyyə üzrə ixtisaslaşan Şarlak 1964-cü ildə Ortopediya və Travmatologiya Klinikasında baş assistent təyin edilib.

Elmi fəaliyyətini İtaliya və İngiltərədə davam etdirib.

1969-cu ildə Ortopediya və Travmatologiya üzrə dosent, 1976-cı ildə isə professor elmi adını alıb.

Şarlak 1980-ci ildə briqada generalı, 1988-ci ildə isə general-mayor rütbəsinə yüksəlib. 1988-1994-cü illərdə Gülhane Hərbi Tibb Akademiyasının komandiri, eləcə də Hərbi Tibb Fakültəsinin dekanı vəzifələrində çalışıb.

O, Gülhane Xəstəxanasının baş həkimi, Gülhane Səhiyyə Fondunun prezidenti, Səhiyyə Nazirliyinin Ali Səhiyyə Şurasının üzvü və Beynəlxalq Hərbi Tibb Komitəsinin prezidenti kimi mühüm vəzifələr də tutub.

1994-cü ildə general-mayor rütbəsi ilə hərbi xidmətdən təqaüdə çıxan Şarlak 1994-1996-cı illərdə Ali Təhsil Nəzarət Şurasının üzvü olub.

1996-cı il avqustun 6-da İnönü Universitetinin rektoru vəzifəsinə başlayan Şarlak 2000-ci il avqustun 6-dək bu vəzifəni icra edib.

Professor Ömər Şarlak Türkiyə Müasir Cərrahiyyə Təlim və Tədqiqat Assosiasiyasının keçmiş prezidenti, Türkiyə Yol Qəzalarına Yardım Fondunun keçmiş idarə heyəti üzvü və Ufuk Universitetinin keçmiş qəyyumu kimi də fəaliyyət göstərib.

Ömər Şarlak həm hərbi tibb, həm də akademik sahədə uzun illər xidmət göstərən elm və səhiyyə xadimi kimi tanınıb.

Həmçinin oxuyun

TƏCİLİ! Avtomobil aşaraq yanıb, ölən və xəsarət alan var

Coşqun və Ucalın ölümünün şok detalları:200-300 metr aralı olublar -VİDEO

Bu şəxslərə əmək pensiyası xüsusi qaydada təyin olunur – AÇIQLAMA 

Qadınların 55 yaşında pensiyaya çıxması ilə bağlı AÇIQLAMA