Abituriyentlərin nəzərinə: Universitet seçərkən bu səhvi etməyin! 

Ali təhsil müəssisələrinə qəbul prosesi yaxınlaşdıqca, abituriyentləri düşündürən əsas məsələlərdən biri də universitet seçimidir. Bu mərhələdə namizədlər təkcə topladıqları bala uyğun ali təhsil müəssisəsini deyil, həm də gələcək peşə və karyera yolunu müəyyən edəcək mühüm qərar verməli olurlar. Son illər universitetlərin beynəlxalq və yerli reytinqləri, nüfuzu, diplomun tanınması kimi amillər seçimdə daha çox ön plana çıxsa da, ixtisasın tədris keyfiyyəti, akademik heyət, təcrübə imkanları və məzunların əmək bazarındakı uğurları kimi meyarların da az əhəmiyyət daşımadığı vurğulanır.

Mövzu ilə bağlı Modern.az-a açıqlamasında təhsil eksperti Elçin Əfəndi qeyd edib ki, abituriyent universitet seçərkən həm beynəlxalq, həm də yerli reytinqləri mütləq nəzərə almalıdır.

"Xüsusilə beynəlxalq reytinqlərdə yer almaq vacib amildir. Çünki abituriyent gələcəkdə təhsilini xaricdə davam etdirmək istədiyi halda, bitirdiyi ali təhsil müəssisəsi qəbul prosesində rol oynayan əsas elementlərdən biri olur. Bu baxımdan universitet seçərkən beynəlxalq reytinqlər nəzərə alınmalıdır. Bununla yanaşı, ixtisasın və universitetin tədris keyfiyyəti də əsas meyarlardandır".

Ekspert qeyd edib ki, eyni ixtisas bir neçə universitetdə tədris olunursa, həmin ixtisasın daha əvvəl tədris edildiyi ali təhsil müəssisəsinə üstünlük verilməsi daha məqsədəuyğundur. Onun sözlərinə görə, belə universitetlər həmin istiqamət üzrə artıq maddi-texniki baza və infrastruktur formalaşdırdığı üçün daha keyfiyyətli tədris imkanlarına malik olur:

"Son illərdəki müşahidələrimizə görə, bir çox gənc universitet seçərkən ali təhsil müəssisəsinin nüfuzuna da üstünlük verir. Xüsusilə yüksək bal toplayan abituriyentlər daha perspektivli və prestijli universitetləri seçirlər. Buna misal olaraq Bakı Ali Neft Məktəbini, ADA Universitetini, Azərbaycan Dövlət İqtisad Universitetini (UNEC) və özəl ali təhsil müəssisələri arasında Xəzər Universitetini göstərmək olar. Abituriyentlərin bu universitetlərə üstünlük verməsinin əsas səbəbi onların beynəlxalq reytinqlərdə tanınması və yüksək tədris keyfiyyətinə malik olmasıdır. Bu seçim gələcək karyera baxımından da uğurlu nəticələr verir", - deyə E.Əfəndi qeyd edib. 

Həmçinin oxuyun

TƏCİLİ! Avtomobil aşaraq yanıb, ölən və xəsarət alan var

Coşqun və Ucalın ölümünün şok detalları:200-300 metr aralı olublar -VİDEO

Bu şəxslərə əmək pensiyası xüsusi qaydada təyin olunur – AÇIQLAMA 

Qadınların 55 yaşında pensiyaya çıxması ilə bağlı AÇIQLAMA