Qaranlığa keçəndə gözlər niyə dərhal görmür? – Həkimdən AÇIQLAMA  

İşıqlı mühitdən qaranlığa keçdikdə ilk saniyələrdə hər şeyi tam qaranlıq görsək də, bir neçə saniyə sonra gözlərimiz adaptasiya olunur və otaqdakı əşyaları (tam aydın olmasa də) seçməyə başlayırıq. Bəs bu proses necə tənzimlənir, sağlam gözlə xəstə gözün reaksiyası arasında hansı fərqlər var və hansı hallarda adaptasiya prosesi ciddi şəkildə gecikir?

Mövzu ilə bağlı Oxu24.com-a danışan tanınmış həkim-oftalmoloq Ruslan Məmmədov mühüm məqamlara toxunub.

Həkim bildirib ki, qaranlığa adaptasiya prosesi gözün torlu qişasının sağlam olub-olmamasından birbaşa asılıdır:

“Gözündə hər hansı bir patologiyası olmayan, sağlam insanlarda qaranlığa adaptasiya çox tez baş verir. Yəni işıqdan qaranlığa keçid zamanı gözün yeni mühitə uyğunlaşması cəmi bir neçə saniyə çəkir və insan ətrafındakı predmetləri ayırd edə bilir. Lakin gözündə problem olan şəxslərdə bu mexanizm fərqli işləyir”.

Oftalmoloqun sözlərinə görə, bəzi spesifik və xroniki xəstəliklər var ki, onlar birbaşa gözün torlu qişasına təsir edərək adaptasiya prosesini ciddi şəkildə ləngidir. Həmin patologiyalar sırasına aşağıdakılar daxildir:

1.Şəkərli diabet: Bu xəstəlik fonunda göz dibində və torlu qişada yaranan fəsadlar fərdlərdə qaranlığa uyğunlaşma qabiliyyətini aşağı salır.

2.Torlu qişanın piqmentli degenerasiyası: Tibbi dildə belə adlandırılan bu patologiya xalq arasında daha çox “toyuq korluğu" kimi tanınır.

Ruslan Məmmədov qeyd edib ki, yuxarıda sadalanan xəstəliklərdən əziyyət çəkən pasiyentlərdə təkcə işıqdan qaranlığa deyil, eyni zamanda qaranlıqdan işıqlı mühitə keçid də problemli olur. Bu qrup insanlarda adaptasiya müddəti normadan qat-qat uzanır və onlar ətraf mühiti çox daha gec və çətinliklə qavramağa başlayırlar.

Ona görə də, qaranlıq mühitə keçərkən gözlərinizin uyğunlaşmasında ciddi və uzunmüddətli ləngimələr hiss edirsinizsə, vaxtında həkim-oftalmoloq müayinəsindən keçmək və torlu qişanın vəziyyətini yoxlatmaq tövsiyə olunur.

Həmçinin oxuyun

SON DƏQİQƏ! Seyfəddin Rəhimov dünyasını dəyişib

Arzum bu halda azadlığa çıxa bilər - Vəkil açıqladı 

Vida mərasimində Azərbaycana mesaj: 139-cu ayə ilə nəyə eyham vuruldu? 

“Uzundərə" hədəfdədir: Erməni saxtakarlığı və elmi həqiqətlərin qarşıdurması — “Oxu24.com"un ARAŞDIRMASI