Onlayn alış-verişdə aldadılan vətəndaşlar nə etməlidir? – Hüquqşünasdan mühüm xəbərdarlıq

CƏMİYYƏT

500

08.04.2026, 16:06

Son illər onlayn ticarətin genişlənməsi ilə bərabər, istehlakçıların aldadılması hallarına da tez-tez rast gəlinir. Bəs, həm ölkə daxilində, həm də xaricdən edilən alış-verişlərdə vətəndaş öz hüquqlarını necə qorumalıdır?

Oxu24.com xəbər verir ki, hüquqşünas Əkrəm Həsənov mövzu ilə bağlı vətəndaşlara vacib tövsiyələr verib.

Ekspert qeyd edir ki, istər onlayn, istərsə də real alqı-satqı zamanı vətəndaşın həm məhkəməyə müraciət etmək, həm də dövlət qurumları qarşısında məsələ qaldırmaq hüququ var.

Əkrəm Həsənovun sözlərinə görə, əgər satıcı Azərbaycan daxilində fəaliyyət göstərirsə, vətəndaşın əlində kifayət qədər hüquqi rıçaqlar var:

* Dövlət Agentliyinə şikayət: Vətəndaş Azərbaycan Respublikası İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət edə bilər.

* Məhkəmə iddiası: Eyni zamanda satıcıya qarşı məhkəmədə iddia qaldırmaq mümkündür.

* Hər iki yol: Vətəndaş həm agentliyə, həm də məhkəməyə eyni vaxtda müraciət etmək hüququna malikdir.

Hüquqşünas bildirir ki, problem xarici onlayn platformalardan mal alan zaman yaranır. Qanun baxımından vətəndaşın xarici satıcıya qarşı da iddia qaldırmaq hüququ olsa da, praktiki olaraq bu, çox vaxt səmərəsizdir:

"Vətəndaş xarici ölkənin məhkəməsinə müraciət etməli və həmin ölkənin istehlakçı hüquqlarını qoruyan qurumları ilə əlaqə saxlamalıdır. Birincisi, vətəndaşın buna biliyi və imkanı yetməyə bilər. İkincisi, xarici məhkəməyə çəkilən xərclər alınan malın qiymətindən dəfələrlə çox olacaq. Yəni qanun buna icazə versə də, iqtisadi cəhətdən bu, vətəndaşa sərf etmir”.

Aldanmamaq üçün nə etməli?

Ekspert vətəndaşları onlayn alış-veriş zamanı ehtiyatlı olmağa və aşağıdakı məqamlara diqqət yetirməyə çağırır:

1.Tanınmış platformalara üstünlük verin: Hər saytdan alış-veriş etmək olmaz. Yalnız dünya miqyasında tanınmış, reytinqi yüksək olan platformaları seçmək lazımdır.

2.İmic məsələsi: Böyük şirkətlər öz imiclərini qoruyurlar. Onlar haqqında mənfi rəylərin yayılması müştəri itkisinə səbəb olduğu üçün, belə şirkətlər narazı müştərinin problemini operativ həll etməyə çalışırlar.

3.Rəyləri oxuyun: Malı sifariş etməzdən əvvəl satıcı haqqında digər alıcıların fikirləri ilə tanış olmaq riskləri minimuma endirir.

Hüquqşünas yekun olaraq qeyd edir ki, xarici bazarda hüquqi prosedurların çətinliyini nəzərə alaraq, ən yaxşı müdafiə üsulu elə seçim zamanı diqqətli olmaqdır.

Çimnaz Telmanqızı

Həmçinin oxuyun