Stentlərin ömrü nə qədərdir?— Kardioloqdan VURĞU: Bunlara əməl etsəniz, ömürlük olacaq!

TİBB

248

26.08.2026, 14:15

Xəbərlərimizi Google-da izləyin

Yeniliklərdən dərhal xəbərdar olun

Ürək-damar xəstəlikləri müasir dövrdə ən çox yayılan və insan həyatı üçün ciddi təhlükə yaradan sağlamlıq problemlərindən biridir. Bu xəstəliklərin müalicəsində ən çox tətbiq edilən effektiv üsullardan biri isə daralmış və ya tıxanmış damarların açılması üçün stentlərin yerləşdirilməsidir. Lakin stent əməliyyatı keçirən pasiyentləri və onların yaxınlarını ən çox düşündürən məsələ bu tibbi vasitələrin istifadə müddətidir. Çox vaxt stentlərin müəyyən bir "son istifadə tarixi" olduğu zənn edilsə də, real mənzərə tamamilə fərqlidir. Mütəxəssislər bildirirlər ki, həkim peşəkarlığından tutmuş pasiyentin həyat tərzinə qədər bir çox amil onların ömrünə birbaşa təsir göstərir. Oxu24.com mövzu ilə bağlı mütəxəssis rəyini öyrənərək oxucularına vacib məqamları təqdim edir.

Mövzu ilə bağlı Oxu24.com-a invaziv kardioloq Üzeyir Rəhimov ətraflı açıqlama verib.

“Stentlərin təkrar tutulma ehtimalı cəmi 2 faizdir”

Kardioloq Üzeyir Rəhimov bildirir ki, "Stentin ömrü nə qədərdir?" sualına cavab vermək, "Avtomobilinizin ömrü nə qədərdir?" sualına cavab vermək qədər mürəkkəbdir. Həkimin sözlərinə görə, müasir təbabətdə istifadə olunan 3-cü nəsil, yəni son nəsil dərmanlı stentlərin təkrar tutulma ehtimalı cəmi-cümlətanı 2% təşkil edir.

Stentin ömrünü müəyyən edən 3 ana faktor mövcuddur:

1. Həkim-operator amili: Əməliyyatı həyata keçirən mütəxəssisdən çox şey asılıdır. Damar diametrinə tam uyğun stentin seçilməsi, stentin içi yüksək atmosfer təzyiqində yaxşı şişirdilərək damar divarının formasını tam alması təmin edilərsə, həmin stentin təkrar tutulma ehtimalı demək olar ki, yoxdur.

2. Damarın və pasiyentin xüsusiyyətləri: Pasiyentin damarının nə dərəcədə kirəcləşməsi və darlığın uzunluğu nəticəyə təsir edir. Bundan əlavə, şəxsdə şəkərli diabet, yüksək qan təzyiqi və ya böyrək xəstəliyinin olması da əməliyyatın və stentin gələcək nəticələrinə birbaşa təsir göstərən faktorlardandır.

3. Pasiyentin riayəti: Stentin uzunömürlülüyündə ən böyük məsuliyyət pasiyentin üzərinə düşür. Həkim tövsiyələrinə, xüsusilə dərman qəbuluna dəqiq eməl olunmalıdır. Bunların başında isə xolesterin dərmanları gəlir.

Həkim qeyd edib ki, insanlarımız çox vaxt xolesterin dərmanlarını özbaşına kəsməyə çalışırlar. Bu dərman kəsildikdə yağlar təzədən həmin bölgəyə yığılaraq damarı yenidən tıxayır.

Kardioloq vurğulayır ki, təzyiq və şəkər tam nəzarət altında saxlanılmalı, pəhrizə və digər tibbi göstərişlərə riayət olunmalıdır. Bu faktorlara düzgün diqqət yetirildiyi təqdirdə, yerləşdirilən stent pasiyentə ömürlük xidmət edə bilər.

Həmçinin oxuyun