Azərbaycanda hərbi xidmət müddəti azaldılacaq? – AÇIQLAMA  

Azərbaycanda müddətli hərbi xidmətin şərtləri, xüsusən də xidmət müddətinin qısaldılması və ödənişli hərbi xidmət modelinin tətbiqi məsələsi vaxtaşırı cəmiyyətin gündəminə gəlir. İctimaiyyətdə bu istiqamətdə hər hansı yeniliyin olub-olmayacağı ilə bağlı müxtəlif ehtimallar səsləndirilir. Lakin hazırkı mürəkkəb regional təhlükəsizlik reallıqları fonunda belə dəyişikliklərin yaxın gələcəkdə nə dərəcədə real olduğu sual doğurur. Ətrafımızda cərəyan edən hərbi-siyasi proseslər dövlətin müdafiə qabiliyyətinin daim yüksək səviyyədə saxlanılmasını tələb edir. Bəs mövcud təhlükəsizlik şəraiti nəzərə alınmaqla xidmət müddətinin azaldılması və ya ödənişli xidmətə keçid nə dərəcədə mümkündür?

Mövzu ilə bağlı Oxu24.com-a açıqlama verən hərbi ekspert Ədalət Verdiyev bildirib ki, hazırda Azərbaycanda müddətli hərbi xidmət müddətinin qısaldılması və ya ödənişli hərbi xidmət modelinin tətbiqi məsələsi aidiyyəti dövlət strukturları tərəfindən müzakirə olunmur.

Ekspert vurğulayıb ki, regiondakı mövcud təhlükəsizlik reallıqları belə adımların atılmasına imkan vermir:

"Azərbaycanın həm şimalında, həm cənubunda genişmiqyaslı müharibə və münaqişələrin davam etdiyi bir vaxtda belə bir məsələnin müzakirə olunması məqsədəuyğun deyil. Digər tərəfdən isə Ermənistan ilə Azərbaycan arasında sülh sazişi hələ də imzalanmayıb. Nəzərə alsaq ki, Silahlı Qüvvələrimiz kifayət qədər ciddi vəzifə və öhdəliklər yerinə yetirir, belə bir vəziyyətdə Azərbaycan hərbi xidmətə çağırış müddətinin qısaldılması və ya ödənişli hərbi xidmətin tətbiqi məsələsində milli və dövlət maraqlarımıza zidd addımlar ata bilməz".

Ə.Verdiyev xatırladıb ki, bu barədə rəsmi müstəvidə heç bir təşəbbüs yoxdur:

"Xatırladıram ki, hazırda nə aidiyyəti dövlət strukturlarından, nə Silahlı Qüvvələr komandanlığından, nə də müvafiq qanunverici orqandan xidmət müddətinin qısaldılması və ya ödənişli xidmətin tətbiqi barədə bir dəfə də olsun təklif qəbul edilməyib. Belə bir hələlik zərurət duyulmayan məsələlərin zaman-zaman gündəmə gətirilməsi, fikrimcə, məqsədli xarakter daşıyır".

Çimnaz Telmanqızı

Həmçinin oxuyun

Xan ilk dəfə danışdı: Nigarla nişan niyə pozulub? (VİDEO)

Vilayət Eyvazov TDT ölkələrinin daxili işlər nazirlərinin iclasında iştirak etdi - FOTO 

Maaş və pensiyalarla bağlı müjdə: artım olacaq – Konkret tarix bilindi 

Bakıda 3 saat işıq olmayacaq