Azərbaycanın bu ölkəylə əlaqələri yeni mərhələyə yüksəlir: Əməkdaşlıq genişlənir — ŞƏRH  

Azərbaycan və Türkmənistan arasında regional əməkdaşlığın gücləndirilməsi və ikitərəfli əlaqələrin keyfiyyətcə yeni mərhələyə qaldırılması istiqamətində mühüm addım atılıb. Prezident İlham Əliyev və Türkmənistan Prezidenti Sərdar Berdiməhəmmədovun iştirakı ilə iki ölkə arasında Birgə Bəyanat imzalanıb. Bununla yanaşı, hər iki dövlətin aidiyyəti nazirlik və dövlət qurumlarının rəhbərləri tərəfindən iqtisadiyyat, energetika, nəqliyyat-gömrük, səhiyyə, kənd təsərrüfatı, idman və xarici siyasət sahələrində ikitərəfli saziş, memorandum və proqramlar mübadilə edilib.

Bu sənədlərin mübadiləsi iki ölkə arasında mövcud olan çoxşaxəli əməkdaşlığın gələcək perspektivlərini daha da genişləndirir. Xüsusilə energetika və logistika sahələrindəki tərəfdaşlıq regional miqyasda mühüm əhəmiyyət kəsb edir. Hər iki dövlətin siyasi iradəsi və iqtisadi potensialı bu əlaqələrin fundamental əsaslar üzərində qurulduğunu bəyan edir.

Mövzu ilə bağlı Oxu24.com-a açıqlama verən politoloq Ramiyə Məmmədli iki ölkə arasındakı münasibətlərin hazırkı səviyyəsini və gələcək perspektivlərini şərh edib.

Politoloq Ramiyə Məmmədli qeyd edib ki, Azərbaycan və Türkmənistan artıq uzun müddətdir Xəzər dənizi hövzəsinin ətrafında olan ölkələr kimi çox normal münasibətlər sisteminə malikdirlər və bu əlaqələr müsbət axarla davam edir. Onun sözlərinə görə, hazırkı mərhələdə bu münasibətlər həm iqtisadi, həm də siyasi məsələlərdə daha geniş müstəviyə keçərək tərəfdaşlıq münasibətlərinə doğru irəliləyib. Keçmiş illərdə də oxşar xarakterli görüşlərin keçirildiyini xatırladan ekspert, builki danışıqları və imzalanan son sənədləri fərqləndirən əsas cəhətin bu tərəfdaşlığın artıq daha üst səviyyəyə yüksəlməsi və münasibətlərin yeni modelini formalaşdırması olduğunu vurğulayıb.

R.Məmmədli iki ölkə arasında keçmişdə mövcud olan bəzi həll olunmamış məsələlərə də toxunub:

“Əvvəlki dövrlərdə Xəzər hövzəsi ilə bağlı Türkmənistan və Azərbaycan arasında müəyyən narazılıqlar və anlaşılmazlıqlar mövcud idi. Lakin bu gün həmin anlaşılmazlıqların dialoq çərçivəsində, vahid masa arxasında müzakirə olunaraq həll edilməsi hər iki dövlətin gələcək perspektivlər naminə əlindən gələni etdiyini göstərir. Bu yanaşma gələcək logistik yolların daha geniş işlənməsinə şərait yaradır və ölkələri daha sıx tərəfdaşlığa sövq edir”.

Politoloq vurğulayıb ki, bu ölkələr artıq həm energetika, həm də logistika baxımından bir-birlərini tamamilə tamamlamağa başlayıblar. Hər iki dövlətin bu sahədə uzun müddətdir çalışdığını və böyük nailiyyətlər əldə etdiyini deyən həmsöhbətimiz, ikitərəfli formatda iş birliyinin bu uğurları daha da genişləndirəcəyini bildirib. Onun fikrincə, son imzalanan sənədlər həm energetika, həm logistika, həm də siyasi-iqtisadi infrastruktur baxımından genişmiqyaslı bir addımdır.

Açıqlamasının sonunda Ramiyə Məmmədli qeyd edib ki, bu əməkdaşlıq geniş gələcək üçün hesablanıb və regionda baş verən bütün iqtisadi-siyasi hadisələrə öz müsbət təsirini göstərəcək. İmzalanan memorandumlar və sənədlər həm logistik layihələrin genişlənməsinə, həm də iqtisadi rifahın yüksəlməsinə xidmət etməklə, iki ölkənin gələcək birgə addımlarının əsas təminatçısı rolunda çıxış edir.

Çimnaz Telmanqızı

Həmçinin oxuyun

SON DƏQİQƏ! Milli Məclis mühüm qərarlar qəbul etdi 

6 ay sonra qüvvəyə minəcək  —  Milli Məclis qərar qəbul etdi

Milli Məclis yeni qərar qəbul edib

İlham Əliyev həmin şəxsin adını AÇIQLADI:Azərbaycana birinci yardım edən...