Şamaxı Azərbaycanın yeni turizm mərkəzinə çevrilir – Prezidentin səfəri və ekspert rəyi

SİYASƏT

1528

24.03.2026, 10:33

Oxu24.com xəbər verir ki, Azərbaycan Respublikasının Prezidenti İlham Əliyev Şamaxı rayonuna son səfəri çərçivəsində bölgənin turizm potensialına xüsusi diqqət ayırıb. Dövlət başçısı regionda həyata keçirilən infrastruktur layihələrinin, yol şəbəkəsinin və turizm obyektlərinin inkişafının Şamaxını ölkənin aparıcı turizm mərkəzlərindən birinə çevirəcəyini bildirib.

Prezidentin çıxışında vurğulanıb ki, ölkədə turizmin şaxələndirilməsi siyasəti çərçivəsində regionlarda yeni turizm məhsullarının yaradılması, müasir infrastrukturun qurulması və beynəlxalq səviyyədə tanıtım işlərinin genişləndirilməsi əsas prioritetlərdəndir.

Mövzu ilə bağlı Oxu24.com-a danışan turizm eksperti Ruslan Quliyev bildirib ki, Şamaxı demək olar ki, bütün alternativ turizm növlərinin inkişafı üçün unikal imkanlara malikdir:

• Ekoturizm

• Kənd və yaşıl turizm

• Dini turizm

• Macəra turizmi

• Sağlamlıq turizmi

• Etnoqrafik turizm

Ekspertin sözlərinə görə, bölgədə mövcud olan zəngin təbiət, tarixi və dini abidələr, eləcə də Şamaxı Rəsədxanası ətrafında formalaşdırılan marşrutlar turizm cazibəsini daha da artırır.

Ruslan Quliyev qeyd edib ki, Şamaxı–Quba dağ marşrutu üzrə trekking, atçılıq və off-road safari turlarının təşkili üçün geniş imkanlar mövcuddur. Bundan əlavə, Dəmirçi və Lahıc istiqamətində ekoturizm marşrutlarının inkişafı bölgəyə marağı artıracaq əsas amillərdəndir.

Ekspert həmçinin “Azərbaycanın 5 Paytaxtı” turizm marşrutunun (Bakı, Gəncə, Şamaxı, Qəbələ, Bərdə) yenidən gündəmə gətirilməsinin vacibliyini vurğulayıb. Onun sözlərinə görə, Şamaxının coğrafi mövqeyi – paytaxta yaxınlığı (təxminən 120 km) onu qısamüddətli səfərlər üçün ideal istiqamətə çevirir.

Şamaxının turizm potensialı yüksək olsa da, bəzi istiqamətlərdə inkişaf zəruridir:

• Otellərin və yataq fondunun artırılması

• Hazır tur paketlərinin hazırlanması (1–2 gecəlik)

• Rəqəmsal platformalarda aktiv tanıtım

• Festival və tədbirlərin təşkili

• Bloqer və influenser turlarının keçirilməsi

"Bölgədə gələcəkdə balon turizmi, qastro-turizm, xalçaçılıq və şərab marşrutları kimi tematik layihələrin həyata keçirilməsi Şamaxının beynəlxalq turizm bazarında mövqeyini daha da gücləndirə bilər”,-deyə ekspert əlavə edib.

Beləliklə, Prezidentin Şamaxıya səfəri bir daha göstərir ki, region Azərbaycanın turizm strategiyasında xüsusi yer tutur. İnfrastrukturun inkişafı, yeni marşrutların yaradılması və düzgün marketinq siyasəti ilə Şamaxının digər turizm bölgələri ilə rəqabət aparmaq potensialı kifayət qədər yüksək qiymətləndirilir.

Çimnaz Telmanqızı

Həmçinin oxuyun