"Nazirlər Kabineti yanında operativ qərargah bu gün daha 9 yeni xəstənin müalicəyə cəlb edildiyini bildirib. Düşünürəm ki, Nazirlər Kabineti Azərbaycanda 53 yoluxma faktının xəritəsini şəhərlər üzrə (əgər sadəcə Bakıda deyilsə, Bakıda isə Bakının rayonları üzrə) açıqlamalıdır".

Pravda.az-ın xəbərinə görə, bu təkliflə hüquqşünas Ələsgər Məmmədli çıxış edib.

"Hər kəs yaşadığı yerdə nə qədər ciddi təhlükə altında olduğunu dərk etməsi baxımından bu zəruridir. İnsanlar heç də hər biri məsuliyyət hissi ilə davranmır. Bu böyük problemlər yaratmadan önləyici tədbir kimi xəstəliyin xəritəsinin əlçatan olması zəruridir. Xəstəliyin ilk başladığı Çində də, İtalyada da, İranda da hər kəs bilir ki, hansı bölgə daha ciddi təhlükə yaşayır. Bu gizlədiləcək fakt deyil və toplumda hər hansı panika yaratmaz. Əgər faktların və proqnozların açıqlanması cəmiyyətdə təhlükə və ya qorxu yaratsaydı, yəqin ki, Almaniyanın Kansleri: "ölkə əhalisinin 70%-nin yoluxma ehtimalı"ndan danışmazdı. Eyni zamanda DST-nın rəsmisi: "zamanında tədbir görməsək az inkişaf etmiş ölkələrdə ölümlərin sayının milyonlar ola bilər"- açıqlamasını eşitməzdik" - Ə.Məmmədli qeyd edib.