Ucarda bir qrup sakin örüş yerlərinin qanunsuz zəbt olunmasına etiraz əlaməti olaraq, aksiya keçirib.

OXU24.COM -UN xəbərinə görə, rayonun Lək kənd sakinləri kənd bələdiyyəsinin inzibati binasının qarşısına toplaşıblar. Onlar zəbt olunmuş örüş yerlərinin boşalmasını və həmin şəxslərə qarşı qanunu tədbir görülməsini tələb ediblər.

Hadisə yerinə gələ Rayon İcra Hakimiyyətinin hüquqşünası  Xəyyam Səmədzadə və Rayon Polis Şöbəsinin İTB-nin rəisi Səbuhi İsmayılov sakinlərlə görüşüb və onların şikayətini dinləyiblər. X. Səmədzadə örüş sahələrini zəbt edənlərə torpaqların 10 gün müddətinə boşaldılması barədə bildirişlərin paylanacağını bildirib. O qeyd edib ki, bundan sonra zəbt olunmuş sahələr boşaldılmasa, bu barədə aidiyyəti orqanlara məlumat veriləcək. Bildirilib ki, problem yaxın vaxtlarda müsbət həllini tapacaq.

Xatırladaq ki, bu gün Ucarın digər kəndi Bərgüşad sakinləri magistral yolu bağlayaraq etiraz aksiyası keçirib.Onlar su problemindən gileylənib.

Rayonun icra başçısı sakinlərlə görüşə gəlib.