Hüseyn Abdullayev əfv xəbərini təkzib edir, - anası məktub yazıb

Həbsdə olan Hüseyn Abdullayev əfv istəmədiyini deyir. Anası Zeynəb Abdullayevanın ölkə rəhbərliyinə müraciəti var.

Musavat.com xəbər verir ki, bir neçə gündür sosial şəbəkələrdə sabiq deputat, "Quska" ləqəbli Hüseyn Abdullayevin əfv üçün müraciət etməsi ilə bağlı məlumatlar dolaşır.

Hüseyn Abdullayev bu gün həbsxanadan göndərdiyi məktubunda əfv istəmədiyini bildirib. O, günahsız yerə həbs edildiyini və buna görə də heç vaxt əfv istəməyəcəyini deyir. Sabiq deputat barəsində bəraət hökmü çıxarılmasını istəyir.

Məlumata görə, Hüseyn Abdullayevin əfv istəməsi ilə bağlı xəbərlərin yayılmasına səbəb anası Zeynəb Abdullayevanın ölkə rəhbərliyinə məktub yazması olub.

Z.Abdullayeva yazdığı məktubla bağlı bildirib ki, bunu oğlundan gizlin edib.

"Mən məktubumda ana olduğumu, 70 yaşımda oğlumun həbsdə qalmasına dözə bilmədiyimi, onun günahsız olduğunu və azadlığa buraxılmasını xahiş etmişəm. Amma məktubun cavabı Hüseyn Abdullayevə göndərilib. Məktubda isə yazılıb ki, guya o, əfv üçün müraciət edib"- deyə H.Abdullayev qeyd edib.

Xatırladaq ki, Bakı Hərbi Məhkəməsinin hökmü ilə Hüseyn Abdullayev 6 il müddətinə azadlıqdan məhrum edilib. Anası Zeynəb Abdullayeva isə 4 min manat cərimə edilib.

İttihama görə H.Abdullayev külli miqdarda məbləğdə vergiləri dövlət büdcəsinə ödəməkdən yayınmaqda, qanunsuz sahibkarlıqda suçlanır.

Həmçinin H.Abdullayev dəfələrlə Almaniyadan istifadəsində olan telefondan “Autist Uşaqların Reablitasiyasına Kömək” İctimai Birliyinin sədri Elnur Məmmədova zəng edərək onun və ailə üzvlərinin ünvanına nalayiq ifadələr işlədib, tələblərinə əməl etməyəcəyi halda onları məhv edəcəyi ilə hədələyərək icarə müqaviləsi şərtlərinə görə hər ay ödəməli olduğu 3 min manat icarə haqqı əvəzinə onun nümayəndələrinə 6 min manat pul ödəməsini hədə-qorxu ilə tələb etməkdə günahlandırılıb.

Hüseyn Abdullayev özünü təqsirli bilmir.