Azərbaycanda yeni İnstitut yaradılır: Yerli ekosistemin hansı boşluğu dolacaq? – ÖZƏL  

Azərbaycan Dövlət Neft və Sənaye Universitetinin (ADNSU) nəzdində elmi və rəqəmsal inkişafımız üçün strateji əhəmiyyət kəsb edən Süni İntellekt İnstitutu yaradılır. Universitetin Elm Departamentinin direktoru Əli Əlizadənin sözlərinə görə, bu mərkəzin əsas missiyası fundamental və tətbiqi tədqiqatları bir araya gətirmək, ölkədə davamlı elmi məktəb formalaşdırmaqdır. Ölkəmizdə belə bir institutun təsis olunması yalnız qlobal texnoloji trendlərlə ayaqlaşmaq deyil, həm də daxili rəqəmsal ekosistemin tələblərindən doğan mühüm addımdır. İndiyə qədər süni intellekt sahəsindəki fəaliyyətlər daha çox dağınıq startaplar və fərdi təşəbbüslər çərçivəsində məhdudlaşırdı. Yaranacaq yeni qurum isə akademik mühitlə sənayeni vahid platformada görüşdürmək imkanı verəcək. Bəs Azərbaycanda bu institutun yaradılması hansı real ehtiyaclardan irəli gəlir və hazırda sahədə hansı əsas boşluqlar mövcuddur?

Mövzu ilə bağlı Oxu24.com-a açıqlama verən İT mütəxəssisi bildirib ki, ölkədə vahid elmi çətirin olmaması bu sahənin sistemli inkişafını ləngidən əsas faktorlardan biri idi:

"Bu vaxta qədər süni intellekt sahəsindəki fəaliyyətlər daha çox pərakəndə təşəbbüslər, fərdi startaplar və ya məhdud tədqiqat qrupları şəklində mövcud idi. Akademiyanı real sənaye ilə birləşdirən vahid elmi çətirə böyük ehtiyac duyulurdu”.

Onun sözlərinə görə, hazırda ölkəmizdə bu sahədə mövcud olan ən böyük boşluqlardan biri dərin alqoritmik biliklərə sahip, akademik dərəcəli kadrların çatışmazlığı və Azərbaycan dili üçün böyük dil modelləri (LLM) ilə təbii dil emalı (NLP) resurslarının kifayət qədər zəngin olmamasıdır

“Xarici alətlər dilimizi və yerli konteksti tam dəqiqliklə əhatə edə bilmədiyi üçün milli süni intellekt həllərinin sıfırdan işlənilməsi həyati əhəmiyyət daşıyır”.

Elvin Abbasov əlavə edib ki, yeni yaradılan İnstitut həm yerli elmi potensialı bir mərkəzdə toplayaraq 'beyin axını'nın qarşısını almağa, həm milli rəqəmsal resurslarımızı zənginləşdirməyə, həm də energetika, neft-qaz və mühəndislik kimi real sənaye sahələrinin rəqəmsal transformasiyasına elmi əsaslı töhfə verməyə xidmət edəcək.

Çimnaz Telmanqızı

Həmçinin oxuyun

İlham Əliyev SƏRƏNCAM İMZALADI

Hakan Fidanın Bakıda  görüşünün - Pərdəarxası 

Mehdiyev və Talıbovun yerinə onlar seçildi

Məşhur müğənni bacıların atası niyə həbs olunmuşdu? - HƏYAT HEKAYƏSİ