Şəxsiyyət vəsiqəsini itirənlər yenisi almaq üçün nə qədər pul ödəməlidir? - CAVAB

Vətəndaşları tez-tez maraqlandıran suallardan biri şəxsiyyət vəsiqəsinin itirilməsi zamanı tələb olunan dövlət rüsumu ilə bağlıdır.

Bununla bağlı Oxu24.com saytına müraciət edən vətəndaş Anar Əhmədov bildirib ki, vəsiqəsini itirib və bunun üçün hansı hüquqi addım atmalıdır?

Oxu24.com bildirir ki,  Şəxsiyyət vəsiqəsi oğurlandıqda, vəsiqə sahibi və ya onun qanuni nümayəndəsi bu barədə cinayətin baş verdiyi yerin polis orqanına yazılı müraciət etməlidir. Belə ərizənin qəbul olunması haqqında həmin şəxsə arayış verilir və bu arayış oğurlanmış şəxsiyyət vəsiqəsinin qüvvədən düşməsi barədə Qüvvədən düşmüş sənədlərin dövlət reyestrində qeydiyyatın aparılması və bunun əsasında vəsiqə sahibinin və ya onun qanuni nümayəndəsinin, habelə qanuni nümayəndəsinin notariat qaydasında təsdiq edilmiş etibarnaməsi əsasında təyin olunmuş şəxsin müraciəti ilə yeni şəxsiyyət vəsiqəsinin verilməsi üçün əsas hesab edilir.

Bəs şəxsiyyət vəsiqəsini yenidən almaq neçəyə başa gəlir?

15 yaşına çatmış Azərbaycan Respublikasının vətəndaşlarına  şəxsiyyət vəsiqələrinin verilməsinə görə:

· on gün müddətində verildikdə və ya dəyişdirildikdə - 5 manat;

· üç iş günü müddətində verildikdə və ya dəyişdirildikdə - 50 manat;

· bir iş günü müddətində verildikdə və ya dəyişdirildikdə - 70 manat.

15 yaşına çatmamış Azərbaycan Respublikasının vətəndaşlarına  şəxsiyyət vəsiqələrinin verilməsinə görə:

· on gün müddətində verildikdə və ya dəyişdirildikdə - 5 manat;

· üç iş günü müddətində verildikdə və ya dəyişdirildikdə - 25 manat;

· bir iş günü müddətində verildikdə və ya dəyişdirildikdə - 30 manat.

Azərbaycan Respublikası vətəndaşının şəxsiyyət vəsiqəsinin itirilməsi və ya korlanması ilə əlaqədar yenidən verilməsinə görə:

· on iş günü müddətində verildikdə - 30 manat;

· üç iş günü müddətində verildikdə - 70 manat;

· bir iş günü müddətində verildikdə - 90 manat.

Hazırladı: Miri Məcidli