Bu halda kreditinizi müdiriniz ödəməlidir — Hüquqşünas çoxlarının bilmədiyi QANUNU AÇIQLADI  

Hazırda müxtəlif təyinatlı və müxtəlif ölçülü müəssələrdə əmək haqqının gec verilməsi, və ya bir neçə ay gecikdirilməsi ilə bağlı şikayətlər artmaqdadır. İşçinin əmək haqqı gecikdirilərsə, və yaxud aylarla verilmirsə bu qanunla necə tənzimlənir? İşçinin haqqı necə müdafiə olunur?

Mövzu ilə bağlı  hüquqşünas Vüqar Dadaşov Oxu24.com-un suallarını cavablandırıb.

Hüquqşünas bildirib ki, Azərbaycanda işçiyə əmək haqqının gecikdirilməsi və ya aylarla verilməməsi Azərbaycan Respublikasının Əmək Məcəlləsi ilə qadağan olunur.

"Bu, vəziyyətdən asılı olaraq inzibati və cinayət məsuliyyətinə səbəb olan nəticələr verə bilər. Hazırda qüvvədə olan qanunvericiliyimizə əsasən, işçiyə işəgötürən tərəfindən, müqavilə şərtlərində əlavə qaydalar nəzərdə tutulmadığı halda, əmək haqqı ayda iki dəfədən az olmayaraq verilməlidir. 

Qaldı ki, əmək haqqının gecikdirilməsinə, əlbəttə ki, müəssisənin fəaliyyətindən və ya maliyyə çətinliyindən asılı olmayaraq işçinin əmək haqqının gecikdirilməsinə əsas ola bilməz. Müəssisənin maliyyə çətinliyi və digər səbəblər müəssisənin işçi qarşısında olan öhdəliyinə məhdudiyyət yaratmır".

V.Dadaşov onu da qeyd edib ki, əgər əmək haqqı vaxtında verilmirsə və bir müddətdən sonra ödənilirsə, həmin əmək haqqı ən azı kompensasiya edilmiş şəkildə işçiyə ödənilməlidir.

"Bir maraqlı məqam da var ki, bunu bilmək daha yaxşı olar. İşçi hər hansı əmək haqqına hesab götürərək maliyyə kredit təşkilatlarından kredit götürür və maaşın ödənilməməsi səbəbindən bank və digər maliyyə təşkilatları qarşısında öz öhdəliyini yerinə yetirə bilmədiyi üçün ona maliyyə sanksiyaları tətbiqi halları çoxdur. Bu hallarda, işçi bu dəymiş zərərləri əmək haqqının gecikdirilməsi ilə əlaqələndirərək həmin məbləğin də ödənilməsini müəssisədən tələb edə bilər. 

İlk növbədə belə vəziyyətdə, işçi müəssisəyə yazılı şəkildə müraciət etməlidir. Hüquqi dildə buna pretensiya deyilir. İşçi pretensiya ilə müraciət edərək öz tələblərini irəli sürməlidir. Əgər işəgötürən tərəfindən əmək müqaviləsinin şərtləri pozulursa, işçi müqaviləni birtərəfli qaydada poza bilər və hüquqlarının bərpası, əmək haqqının alınması və kompensasiyanın ödənilməsi ilə bağlı məhkəməyə müraciət edə bilər. 

Digər ən vacib məsələ isə ondan ibarətdir ki, əgər işçiyə iki aydan artıq əmək haqqı verilmirsə və ya bu hal təzyiq forması, sui-istifadə  olunursa, artıq bu, cinayət məsuliyyətinə səbəb olan hal kimi qiymətləndirilir və işəgötürən barəsində Azərbaycan Respublikasının Cinayət Məcəlləsinə uyğun cinayət təqibi başlana bilər”-deyə hüquqşünas  vurğulayıb.

 Əntiqə Rəşid

Həmçinin oxuyun

Bu şəxslərin vərəsələrinə müavinət ödəniləcək - QƏRAR

Sürücülərə XƏBƏRDARLIQ! Bu halda avtomobiliniz cərimə meydançasına aparılacaq 

Əməkhaqqı artımı ilə bağlı RƏSMİ AÇIQLAMA

Azərbaycanda kolleclər bağlanır? – EKSPERTDƏN AÇIQLAMA