Rəsmi işə düzələn zaman əlillik pensiyası kəsilə bilərmi? — Hüquqşünas vacib detalları AÇIQLADI  

“Əmək fəaliyyəti başlayan Qarabağ qazilərinin pensiyası kəsilə bilərmi?” 

Oxu24.com oxuculara hüquqi yardım layihəsini davam etdirir.Bu dəfə təqdim edəcəyimiz mövzu hərbi əməliyyatlar zamanı  zamanı əlillik dərəcəsi almış şəxslərin  işə başladıqları zaman pensiyasının kəsilib,kəsilməməsi ilə bağlıdır.

Qarabağ qaziləri,yəni, əlilliyi olan müharibə iştirakçıları rəsmi müqaviləli işlə təmin olunduqda əlillik pensiyası kəsilə bilərmi? 

Oxu24.com -un  sualını hüquqşünas Vüqar Dadaşov cavablandırıb. 

O, bildirib ki, Qarabağ qazilərinin, xüsusən, əlilliyi olan müharibə iştirakçılarının işlə təmin olunması zamanı pensiyanın kəsilməsi ilə bağlı qanunvericilikdə konkret tələb yoxdur.

"Statusundan asılı olmayaraq, təyin olunmuş pensiyanın dayandırılması ancaq  onun əmək qabiliyyətinin, sağlamlığının bərpasından sonra mümkün ola bilər. Azərbaycan Respublikası Qanunvericiliyində Qarabağ qazilərinə əlilliyin təyini, ləğvi barədə  xüsusi bir imtiyaz ayrıca müəyyən olunmur. Əlillik dərəcəsi və müvafiq pensiya əmək qabiliyyətinin, sağlamlığın dərəcəsinin azalması ilə müəyyən olunur və yalnız bu əsaslarla təyin edilir.",-deyə Vüqar Dadaşov bildirib.

Həmçinin oxuyun

TƏCİLİ! Səhiyyə Nazirliyi başsağlığı yaydı

6 mayda bizi nələr gözləyir?  — ULDUZ FALI

Prezident TƏSDİQLƏDİ: 400 manat məbləğində...

Bu halda da aliment alına bilər   —  Hüquqşünas AÇIQLADI

Hüquqşünas əlilliyə görə təyin edilmiş pensiyanın hansı hallarda kəsilib-kəsilməməsi məsələsinə də aydınlıq gətirib.

"Əlbəttəki, veteran və əlilliyi olan müharibə iştirakçılarına güzəştlər əmək, vergi və sair qanunvericiliyi ilə müəyyən edilib və onların əlilliyə aiddiyatı yoxdur. Əgər, vətəndaşın əlilliyi müalicə dövründə aradan qalxırsa, yəni, onun müalicəsi mümkün olur və sağlamlıq vəziyyəti bərpa edilirsə, bu halda vətəndaşın əlilliyi ləğv edilə bilər.Sözsüz ki, əmək müqaviləsindən, fəaliyyətindən asılı olmayaraq. Ancaq ümumilikdə əlilliyi olan şəxslərin əmək fəaliyyəti ilə bağlı məhdudiyyət mövcud deyil və hər hansı əlilliyi olan şəxsin, o cümlədən Qarabağ qazisinin, əmək fəaliyyəti ilə bağlı müqavilə bağlaması onun pensiyasının kəsilməsinə əsas ola bilməz. Əmək fəaliyyəti şəxsin sağlamlığının imkan verdiyi səviyyədə həyata keçirilir. Əmək müqaviləsi vətəndaşın və ya qazinin sağlamlığında olan əlillik dərəcəsini aradan qaldırmır. Bu baxımdan, əgər şəxsə əlillik təyin olunubsa, onun əmək müqaviləsi bağlaması əlilliyin dərəcəsinin ləğv edilməsinə əsas ola bilməz”,-deyə V.Dadaşov qeyd edib.

V. Dadaşov işlə təmin olunmuş əlilin pensiyanın kəsilməsini qanunauyğun hal hesab etmədiyini bildirib:”Əlbəttə ki, əgər şəxs əlilliyə görə əmək pensiyası alırsa, qanuna uyğun olaraq müqavilə ilə işləmək, dövlət və ya özəl sektorda əmək fəaliyyəti göstərmək, rəsmi maaş almaq və digər hüquqlardan istifadə etmək imkanına malikdir. Hətta müasir dövrdə vətəndaş əlillik dərəcəsi ilə yanaşı distant iş funksiyasını yerinə yetirirsə, və bu birinci dərəcə əlillik halında belə bu mümkündürsə, bu fakt onun əlillik təqaüdünün verilməməsinə əsas ola bilməz. Bir məqama da toxunmaq yaxşı olar. Cəmiyyətimizdə veteran və qazilərlərin sosial statusu ilə yanlış təsəvvürlər var: veteranlıq hüquqi statusdur, əlillik isə sosial statusdur. Bu sosial status sağlamlığın bərpasından sonra aradan qaldırıla bilər. Ancaq veteranlıq isə müddətsiz və daimi hüquqi statusdur və ləğv edilə bilməz. Əlbəttəki statusun alınmasında qanun pozuntusu aşkar edilməsə. Nəinki qazilərin (yəni, əlilliyi müəyyən edilmiş müharibə iştirakçıları) əlilliyi olan, digər şəxsin hər hansı əmək müqaviləsi bağlaması onun əlilliyinə xitam verilməsi üçün hüquqi əsas təşkil etmir”-deyə hüquqşünas Vüqar Dadaşov vurğulayıb.

 Əntiqə Rəşid