Gözdən əlil sürücülük vəsiqəsi ala bilərmi?

Cəmiyyətdə müzakirə doğuran məsələlərdən biri də görmə məhdudiyyəti olan şəxslərin sürücülük vəsiqəsi alıb-almaması ilə bağlıdır. Xüsusilə, üçüncü qrup gözdən əlilliyi olan şəxslərin avtomobil idarə etməsi təhlükəsizlik baxımından ciddi suallar yaradır. Mövzu təkcə fərdi bacarıqla deyil, ictimai məsuliyyət və hüquqi mexanizmlərlə bağlıdır.

Oxu24.com xəbər verir  ki, məsələyə hüquqi prizmadan yanaşdıqda ortaya maraqlı bir boşluq çıxır.

Sürücülük vəsiqəsinin verilməsi qaydalarında görmə məhdudiyyəti və ya gözdən əlilliklə bağlı konkret, açıq qadağa göstərilmir.

Bu isə praktikada ziddiyyətli hallara yol açır.

Tutaq ki, şəxs üçüncü qrup gözdən əlildir, lakin özünü “yaxşı sürücü” hesab edir. Bu fakt onun avtomobil idarə etməyə hüquqi və təhlükəsizlik baxımından tam yararlı olduğu anlamına gəlirmi?

Unutmaq olmaz ki, sürücülük hüququ şəxsi məsələ olmaqdan daha çox ictimai təhlükəsizlik məsələsidir. Sürücü bu gün qəza törədərsə, sabah kiminsə sağlamlığına və ya həyatına zərər vurarsa, məsuliyyət yalnız sürücünün üzərində qalırmı? Yoxsa ona bu hüququ verən qurum da cavabdehlik daşıyır?

Həmçinin oxuyun

Apreldə pensiya gözləyənlərə ŞAD XƏBƏR

İran ordusu BƏYANAT YAYDI

Buraxılış və qəbul İMTAHANLARININ vaxtı dəyişdirilə bilərmi? – EKSPERTDƏN AÇIQLAMA  

Azərbaycanda polkovnik-leytenant VƏFAT ETDİ

Bu nöqtədə əsas səlahiyyət Dövlət Yol Polisi nəzdində fəaliyyət göstərən müvafiq tibbi komissiyaya aiddir.

Komissiya şəxsin sağlamlıq vəziyyətini qiymətləndirərək sürücülük üçün yararlılıq barədə rəy verir. Lakin əgər qanunvericilikdə açıq şəkildə göstərilməyən bir halda – yəni görmə məhdudiyyəti olan şəxsə – sürücülük hüququ verilirsə və sonradan bu, ağır nəticələrə səbəb olursa, məsuliyyət məsələsi qaçılmaz olaraq gündəmə gəlir.

Hüquqi baxımdan belə hallarda əsas məsuliyyət sürücülük hüququnu verən tərəfin – müvafiq komissiya və icazə verən qurumun üzərinə düşür. Çünki qərar subyektiv yanaşma ilə deyil, dəqiq normativ tələblər və ictimai təhlükəsizlik prinsipləri əsasında verilməlidir.

Nəticə etibarilə, üçüncü qrup gözdən əlilliyi olan şəxslərə sürücülük vəsiqəsinin verilməsi məsələsi qanunvericilikdə daha dəqiq və sərt şəkildə tənzimlənməli, subyektiv qərarlara yol verilməməlidir. Əks halda, mümkün fəsadların məsuliyyəti yalnız sükan arxasında olan şəxsin deyil, ona bu hüququ tanıyan qurumların da üzərində qalacaq.

Hazırladı: Jalə