"Vəkildən zaddan işləsin"ifadəsinə vəkildən REAKSİYA

"Əqrəb mövsümü" serialında istifadə olunan   "vəkildən zaddan işləsin" ifadəsinə görə bir qrupun  vəkilin  narazılıq etməsi barədə xəbər vermişdik.

Oxu24.com xəbər verir  ki, bu mövzuda da vəkillər iki hissəyə bölünüb. Bir qrup vəkil bu ifadənin təhqir olduğunu bildirsə də,bunun əksini düşünənlər də var.

Mövzu ilə bağlı Oxu24.com-a danışan vəkil  Sadiq Əfəndiyev bildirib ki,yayılan ifadənin ləkəliyici olub, olmaması ekspertiza tərəfindən aydınlaşdırılmalı olan  məsələdir.

 

"Hüquqda “aşağılanması” deyilən anlayış yoxdur. Burada söhbət Vəkillər Kollegiyasının, o cümlədən vəkil peşəsinin daşıyıcıları olan vəkillərin işgüzar nüfuzunun yaxud şərəf və ləyaqətlərinin ləkələnməsindən söz açıla bilər.

 Hər hansı bir şəxsin şərəf və ləyaqətinin yaxud işgüzar nüfuzunun ləkələnmiş hesab edilməsi üçün müəyyən hüquqi şərtlər mövcud olmalıdır. İlk növbədə yayılan məlumat (ifadə, söz) ləkləyici olmalıdır və həmin ləkələyici məlumat yayılmalıdır. Yayılan ifadənin ləkəliyici olub- olmaması isə ekspertiza tərəfindən aydınlaşdırılmalı məsələdir. Bu cür vəziyyətdə ləkələyici olması ehtimal edilən ifadə hər bir halda işlədildiyi konteksdə qiymətləndirilməlidir.

 Ola bilər ki, serialda aktyorun dilindən səsləndirilən “vəkil” sözünə qoşulmuş “zad” sözü (“vəkildən-zaddan”) vəkil peşəsinin əhəmiyyətsizliyini bildirmək mənasında işlədilmişdir. Təbii ki, vəkilliyə bu cür yanaşma əsassız və haqsızdır. Vəkilliyə digər hüquq peşələri ilə müqayisədə əhəmiyyətsiz peşə kimi yanaşma yalnız ssenari mülləfinin subyektiv yanaşması ola bilər. 
Bununla belə hesab edirəm ki, həmin ifadə qanunun nəzərdə tutuduğu mənada ləkələyici əlamətə malik deyildir. Çünki ləkələyici ifadə əxlaqi baxımdan daha çox nalayiq məna kəsb etməli, yönəldiyi şəxsin nüfuzuna, şərəf və ləyaqətinə mühüm ziyan vurmalıdır. Bu kimi subyektiv və əhəmiyyətsiz ifadələr vəkillik peşəsinin nüfuzuna ziyan gətirə bilməz.
  Şərəf və ləyaqət, eləcə də işgüzar nüfuzun ləkələnməsi ilə bağlı mübahisə mülki məhkəmə icraatının predmetidir. Lakin hesab edirəm ki, bu vəziyyətdə, yəni serialda vəkillik peşəsinin əhəmiyyətsizliyinə dəlalət edən “zad” sözünün səsləndirilməsi ilə bağlı məhkəmə prosesinə ehtiyac yoxdur. Bununla bağlı lazım bilindiyi halda sadəcə Vəkillər Kollegiyasının rəhbərliyi tərəfindən müvafiq yayım şirkətinə iradın bildirilməsi daha adekvat hərəkət hesab edilə bilər",-deyə vəkil bildirib.

 

Miri Məcidli