Hərbi xidmətə yararlılıq necə müəyyən edilir? – Üçmərhələli yoxlama prosesi  

Azərbaycanda gənclərin hərbi xidmətə yararlılıq dərəcəsinin müəyyən edilməsi və sağlamlıq imkanları məhdud şəxslərin statusu cəmiyyətdə ən çox müzakirə olunan mövzulardan biridir. Hərbi ekspert Emin Həsənli mövzu ilə bağlı mühüm məqamlara toxunaraq, prosesin hüquqi tərəfləri və vətənpərvərlik ruhu haqqında maraqlı faktlar açıqlayıb.

Ekspert qeyd edir ki, hərbi xidmətə hazırlıq prosesi hələ 15 yaşından, məktəb dövründə ilkin qeydiyyat və sağlamlıq yoxlanışı ilə başlayır. 18 yaş tamam olduqda isə çağırışçılar daha ciddi və çoxmərhələli tibbi müayinədən keçirlər:

* İlkin mərhələ: Yerli Səfərbərlik və Hərbi Xidmətə Çağırış üzrə Dövlət Xidmətinin rayon şöbələrində yoxlanış.

* İkinci mərhələ: Dövlət Xidmətinin Mərkəzi Hərbi Həkim Komissiyasının müayinəsi.

* Yekun qərar: Tibbi-Sosial Ekspertiza və Reabilitasiya Agentliyi (Əmək və Əhalinin Sosial Müdafiəsi Nazirliyi) tərəfindən verilən son rəy.

Bu sistemin birbaşa Əmək və Əhalinin Sosial Müdafiəsi Nazirliyi ilə əlaqələndirilməsi tam qanunidir, çünki ölkədə əlillik qeydiyyatı məhz bu qurum tərəfindən aparılır.

Emin Həsənli vurğulayır ki, Azərbaycan gəncliyi üçün hərbi xidmət sadəcə bir vəzifə deyil, bir "toy-bayram" ənənəsidir. 44 günlük Vətən Müharibəsi bu ruhun ən böyük sınağı oldu:

"Azərbaycan gəncliyinin 99%-dən çoxu müharibəyə getmək, orduya yazılmaq üçün növbələrə düzülmüşdü. Hətta sağlamlıq problemi olan şəxslər belə könüllü şəkildə döyüşmək istəyirdilər. Bu, vətənpərvərliyin ən yüksək zirvəsidir”.

Saxta sənəd alanları nə gözləyir?

Ordudan yayınmaq məqsədilə saxta sağlamlıq arayışlarına müraciət edənlərin sayının hədsiz az (0.1%-dən də aşağı) olduğunu bildirən ekspert, bu şəxslərə qarşı barışmaz mövqe nümayiş etdirildiyini deyib. O xatırladıb ki, saxta arayış verən həkimlər və sənədi alan şəxslər cinayət məsuliyyəti daşıyırlar:

“Hərbi xidmət keçməyən şəxslərin gələcəkdə hüquq-mühafizə orqanlarında və dövlət strukturlarında çalışmaq şansı demək olar ki, yoxdur”.

Azərbaycanda hərbi xidmətə çağırış sistemi həm şəffaflığı, həm də gənclərin mənəvi hazırlığı baxımından dünya ölkələri arasında ən qabaqcıl sıralardadır. "Hərbi xidmət" yox, "Vətənə xidmət" anlayışı xalqımızın milli kimliyinin ayrılmaz hissəsinə çevrilib.

Çimnaz Telmanqızı

Həmçinin oxuyun

SON DƏQİQƏ! Prezident fərman imzaladı: FHN-in bəzi səlahiyyətləri ləğv edildi

Prezident nazirlə bağlı SƏRƏNCAM İMZALADI

Prezident tapşırıq verdi: Bu ilin oktyabr-noyabr aylarından etibarən...

Pensiya ilə bağlı milyonları maraqlandıran təklif: Hansı yeniliklər olacaq?