Paraqvayın cənubundakı Koronel-Ovyedo şəhərində həkimlər tərəfindən öldüyü bildirilən qadın dəfn üçün hazırlıqlar başlayan vaxt ayılıb.

Oxu24.com bildirir ki, bu barədə “ABC Color” qəzeti məlumat yayıb.

Aprelin 11-də xərçəng xəstəliyindən əziyyət çəkən 46 yaşlı Qledis Rodriqes de Duarte yüksək qan təzyiqi ilə xəstəxanaya çatdırılıb. Saat 09:30-da xəstəyə həkim Eriberto Vera baxıb. Bundan iki saat sonra həkim xəstənin vəfat etdiyini bildirib, xəbəri xəstənin həyat yoldaşı və qızına çatdırıb.

E.Vera xəstə Q.Duartenin ölüm sənədini hazırlayıb və ölüm səbəbi kimi xərçəng xəstəliyini qeyd edib. Xəstə ölülər üçün kisəyə yerləşdirilib və dəfn şöbəsinə göndərilib.

Şöbədə baxış zamanı “vəfat edən” qadının hərəkət etdiyi müşahidə olunub. Xəstə dərhal xəstəxanaya göndərilib.

Hadisə ilə bağlı xəstənin yaxınları həkimi səhlənkarlıqda ittiham ediblər.