Pakistan: Şərtlərimiz qəbul olunarsa, Əfqanıstan administrasiyası ilə danışıqlara hazırıq

Pakistanın baş naziri Şahbaz Şərif Əfqanıstanla toqquşmaların ardınca dünən elan edilən 48 saatlıq atəşkəsin “mesaj” rolunu oynadığını və “qanuni şərtlərini yerinə yetirməyə” hazır olduqları təqdirdə Kabillə danışıqlara hazır olduqlarını bildirib.

Oxu24.com   xəbər  verir  ki,Dawn qəzetinin məlumatına görə, Şərif kabinetdə ölkəsi ilə Əfqanıstan arasındakı gərginliklə bağlı çıxış edib.

İki ölkə arasındakı problemlərin qalıcı həllinə ümid etdiyini vurğulayan Şərif, "Dünən 48 saatlıq müvəqqəti atəşkəs haqqında qərar verdik və bununla da bizim (Əfqan rəhbərliyi) qanuni şərtlərimizi yerinə yetirmək istəsələr, danışıqlara hazır olduğumuz mesajını verdik", deyə qeyd  edib.

Şərif Əfqanıstan rəhbərliyinin məsələyə ciddi yanaşacağı təqdirdə danışıqlara başlamaq üçün lazımi addımları atacaqlarını vurğulayaraq, bəzi müttəfiq ölkələrin də problemin həlli üçün çalışdıqlarını bildirib.

Şərif müvəqqəti atəşkəsin əfqan tərəfinin tələbi ilə elan edildiyini xatırladaraq, “Əgər bu, sadəcə olaraq zamana görə dayanma məsələsidirsə, bunu qəbul edə bilmərik” deyib.

Pakistan Pakistan Talibanına (TTP) qarşı mübarizə çərçivəsində oktyabrın 9-da Kabilə bir neçə hava zərbəsi endirib.

Oktyabrın 11-də Əfqanıstanın təhlükəsizlik qüvvələri Pakistanın sərhəd bölgəsindəki postlarına geniş hücumlarla cavab verib və bəzi yerlərdə toqquşmalar alovlanıb.

Əfqanıstan hökuməti döyüşlərin Qətər və Səudiyyə Ərəbistanının vasitəçiliyi ilə dayandırıldığını elan etsə də, oktyabrın 14-də sərhəddə gərginlik yenidən artıb.

Pakistan Əfqanıstanın atəşkəs tələbindən sonra oktyabrın 15-də 48 saatlıq müvəqqəti atəşkəs elan edib.

2021-ci ildə Taliban Əfqanıstanda nəzarəti ələ keçirəndən bəri Pakistan yeni administrasiyadan TTP-yə qarşı tədbirlər görməsini tələb edir.

İslamabad hökuməti bəyan edir ki, “terror təşkilatı” kimi təsnif etdiyi və ərazisində çoxsaylı hücumlar həyata keçirən TTP Əfqanıstanda yaradılıb, Kabil hökuməti isə bu təşkilata qarşı tədbir görməyib.

Əfqanıstan hökuməti isə TTP-nin öz ərazisində fəaliyyət göstərmədiyini iddia edir.

Nigar

Həmçinin oxuyun

Prezident məmurlara hansı tapşırıqları verib? — İclasın DETALLARI

TƏCİLİ! FHN "Eurohome"bazarını bağladı

Şagird "İdrak"dakı müəllimi buna görə güllələyibmiş - AÇIQLANDI 

Azərbaycanda müğənni qəfil vəfat etdi - FOTO