ABŞ-ın Maui adasında istirahət edən yaşlı kişi köpək balığının hücumuna məruz qalıb.

AzVision.az “The Guardian”a istinadən xəbər verir ki, 65 yaşlı amerikalı aldığı xəsarətlərdən hadisə yerində keçinib.

Məlumata görə, Kaliforniya ştatından olan 65 yaşlı amerikalı sahildən 50 metr aralıda üzürmüş. Bu zaman ona yırtıcı köpək balığı hücum edib. Maui Rayon Yanğın və İctimai Təhlükəsizlik İdarəsi köpək balığının qurbanı olan kişini sahilə çatdırmaq üçün helikopter və su motoskileti göndərib.

Ancaq amerikalının həyatını xilas etmək mümkün olmayıb və hadisə yerindəcə keçinib. Hücumun baş verdiyi Kaanapali sahilində xəbərdarlıq işarələri yerləşdirilib.

Qeyd edək ki, bu, 2015-ci ildən etibarən Havay adalarında köpək balığı hücumu ilə bağlı baş verən ilk ölüm hadisəsidir. May ayının ortalarında isə köpək balığı Avstraliyada bir sörfçüyə hücum edib. Yırtıcı balıq idmançının ayağını bir neçə dəfə dişləsə də, sörfçü canını xilas edə bilib. Oxu24.com