Bundestaq Şolz hökumətinə etimadsızlıq səsverməsi keçirib

Bundestaq üzvlərinin əksəriyyəti Olaf Şolz hökumətinə etimadsızlıq səsverməsini dəstəkləyib.

Oxu24.com xəbər verir  ki, Almaniya kansleri özü koalisiyası dağılandan sonra bu məsələni parlament qarşısında qaldırıb.

Almaniyada erkən seçkilər fevralın 23-nə təyin edilib.

Bundestaqın sədri Barbel Basın verdiyi məlumata görə, 207 parlamentari kanslerin təklifinin lehinə, 394-ü əleyhinə səs verib, 116 deputat isə bitərəf qalıb. Gözlənildiyi kimi, Scholz lazımi 367 səs çoxluğunu ala bilməyib.

İndi ölkə prezidenti Frank-Valter Ştaynmayer 21 gün ərzində Bundestaqın buraxılıb-dağılmaması barədə qərar verməlidir, BBC qeyd edir. O, daha əvvəl demişdi ki, “ölkəyə sabit səs çoxluğu və hərəkət edə bilən hökumət lazımdır”, ona görə də Ştaynmayerin Bundestaqı buraxacağı gözlənilir.

Daha sonra 60 gün ərzində Almaniyada yeni seçkilər keçiriləcək.

Sorğulara görə, Fridrix Merzin rəhbərlik etdiyi Xristian partiyaları CDU/CSU koalisiyasının erkən seçkilərdə qalib gəlmək şansı ən yüksəkdir: onu seçicilərin 30%-dən bir qədər çoxu dəstəkləyir. Merz, xüsusilə, hərbi xərcləri artırmağı və qeyri-qanuni mühacirlərə sərhədi bağlamağı vəd edir. O, həmçinin “Taurus” raketlərinin Ukraynaya tədarükünün mümkünlüyünü də istisna etmir - Şolz və onun partiyası buna qarşıdır.

Anketlərə görə, ikinci yeri ifrat sağçı Almaniya üçün Alternativ partiyası tuta bilər. Seçicilərin təxminən 20%-i ona səs verməyə hazırdır. Bununla belə, digər partiyalar ənənəvi olaraq Alternativlə işləməkdən imtina ediblər, ona görə də ifrat sağçıların yeni koalisiyaya qoşulması ehtimalı azdır.

Sosial Demokratlar, sorğulara görə, təxminən 17%, Yaşıllar isə 11% səs toplaya bilər.

Almaniya Konstitusiyası Bundestaqın özbaşına buraxılmasına icazə vermir. Deməli, növbədənkənar seçkilərin keçirilməsinin yeganə yolu hökumətə etimadsızlıq votumu keçirməkdir.

 

Nigar