Silahlı müxalif qrupların Dəməşqə hücumuna görə Suriya prezidenti vəzifəsindən istefa verən Bəşər Əsəd ərəb respublikasında hakimiyyət dəyişikliyindən sonra ilk açıqlamasını verib.

Oxu24.com xəbər verir  ki, Əsəd iddia edir ki, vətəndaş müharibəsi və ondan sonrakı hadisələr zamanı heç vaxt istefa vermək və sığınacaq istəmək barədə düşünməyib.

Onun sözlərinə görə, o, dekabrın 8-i səhər tezdən - silahlı dəstələr paytaxta yaxınlaşan vaxta qədər Dəməşqdə qalıb və yalnız həmin günün axşam saatlarında Suriyanı tərk edib.

Bəşər Əsədin ofisinin sosial şəbəkələrində yayılan bəyanatında deyilir ki, o, Dəməşqdən əvvəlcə Rusiyanın Xmeymim aviabazasına gedib və orada paytaxtın üsyançılar tərəfindən tutulmasından xəbər tutub. O, “terrorçular” tərəfindən ələ keçirilən ölkədə prezident olaraq qalmağı mənasız hesab edib.

Əsədin sözlərinə görə, o, “hərbi əməliyyatları izləmək üçün rus müttəfiqlərimizlə koordinasiya etmək üçün” Latakiyaya gedib. Əsəd Latakiyadakı bazasına çatanda “qüvvələrimizin bütün döyüş mövqelərindən tamamilə geri çəkildiyi və ordunun son mövqelərinin düşdüyü” məlum olub və “vəziyyət pisləşməkdə davam edib”. Suriyanın eks-prezidenti vurğulayıb ki, bundan sonra Moskva Rusiyaya təcili təxliyə təşkil etməyi təklif edib. "Bu, Dəməşqin süqutundan bir gün sonra, son hərbi mövqelərin süqutundan və bunun nəticəsində bütün qalan dövlət qurumlarının iflicindən sonra baş verdi", - Əsəd paylaşımında qeyd edir.

Eyni zamanda, keçmiş prezident əmin edir ki, bu hadisələr zamanı “o, heç vaxt istefa vermək və ya sığınacaq istəmək haqqında düşünməyib”.

Əsəd açıqlamasında bildirib ki, üsyançıların hücumu zamanı “terror bütün Suriyaya yayılıb və nəticədə ayın  7-si axşam Dəməşqə çatıb”. Bu, dezinformasiya və həqiqətdən uzaq hekayələr selinin fonunda “Prezidentin taleyi və harada olması ilə bağlı suallara” səbəb olub.

O əlavə edib ki, prezidentin bəyanatı daha əvvəl dərc edilməli idi. Lakin "təhlükəsizlik səbəbindən rabitənin tamamilə kəsilməsi də daxil olmaqla, o zaman hökm sürən şərtlər bu bəyanatın yayımlanmasını gecikdirdi."

Nigar