Pensiya yaşında yeni peşə və ali təhsil: Yaşlı nəslin əmək bazarında aktiv qalmaq şansı

CƏMİYYƏT

28.08.2026, 17:59

Ölkəmizdə bu il ali məktəblərə keçirilən qəbul imtahanlarında tələbə adını qazanan ən yaşlı şəxsin 58 yaşı var. 58 yaşında ali məktəbə qəbul olunmaq yalnız fərdi uğur göstəricisi deyil, həm də təhsil almağın heç bir yaş həddi tanımadığını nümayiş etdirən mühüm bir nümunədir. Bu fakt cəmiyyətdə təhsilin yalnız gənclərə məxsus olmadığını, müxtəlif yaş qrupları üçün hər zaman aktual qaldığını bir daha sübut edir. Müasir dövrdə texnologiyaların və əmək bazarının sürətlə dəyişdiyi bir şəraitdə insanın rəqabətə davamlı qalmasının əsas şərtlərindən biri ömrü boyu öyrənmək bacarığıdır. Yeni ixtisas əldə edən yaşlı insanlar əvvəlki iş təcrübələrini yeni biliklərlə sintez edərək əmək fəaliyyətlərini uğurla davam etdirə bilərlər. Hətta bu addım onların tamamilə yeni bir sahəyə keçid etməsinə və zəngin təcrübələrini başqa istiqamətdə reallaşdırmasına geniş imkanlar açır. Bu baxımdan yaşlı insanların təhsilə qayıtması onların pensiya yaşından sonra da əmək bazarında fəal qalması üçün mühüm platforma rolunu oynayır. Artıq peşə öyrənmək və ali təhsil almaq cəmiyyətdəki köhnə stereotiplərin əksinə olaraq yalnız gənclik dövrü ilə məhdudlaşmır. 58 yaşlı tələbənin nümunəsi isə cəmiyyətə sadə və aydın bir mesaj verir: insan üçün yeni bir başlanğıcın yaşı yoxdur.

Mövzu ilə bağlı Oxu24.com-a açıqlama verən təhsil eksperti Şəmsi Qoca bildirib ki, bu cür nümunələr cəmiyyətdə təhsilə olan münasibəti kökündən dəyişdirir və yaşlı nəslin sosial-iqtisadi aktivliyini artırır:

"58 yaşlı şəxsin ali məktəbə daxil olması sadəcə fərdi nailiyyət deyil, sosial və iqtisadi baxımdan dərin mənalar daşıyan hadisədir. Bu, yetkin yaşda olan insanların əmək bazarındakı dinamikaya uyğunlaşmaq əzmini göstərir”.

Ekspert qeyd edib ki, yaşlı nəslin nümayəndələri yeni ixtisas əldə edərkən illərlə toplanmış həyat və iş təcrübəsini akademiyanın verdiyi müasir nəzəri biliklərlə birləşdirirlər. Nəticədə əmək bazarı həm təcrübəli, həm də günün tələblərinə cavab verən kadr qazanır.

Şəmsi Qocanın sözlərinə görə, pensiya yaşına yaxınlaşan və ya bu həddi keçən şəxslərin ali təhsil alması onların cəmiyyətdən təcrid olunmasının qarşısını alır:

“İnsanların pensiyadan sonra da aktiv əmək fəaliyyətini davam etdirməsi həm onların psixoloji rifahına müsbət təsir edir, həm də ölkə iqtisadiyyatı üçün əlavə dəyər yaradır. Müasir dünyada 'ömürboyu təhsil' anlayışı prioritetdir və 58 yaşlı tələbəmizin uğuru bu prinsipin canlı sübutudur”,- deyə ekspert əlavə edib.

Çimnaz Telmanqızı

Həmçinin oxuyun