Belarus Ukrayna ilə bağlı danışıqlarda iştirak etməyi planlaşdırdığını açıqlayıb

Belarus Ukrayna münaqişəsi üzrə danışıqlar masası arxasında yer almaq üçün mübarizə aparır.

Oxu24.com xəbər verir ki, bunu respublikanın xarici işlər nazirinin müavini Yuri Ambrazeviç deyib.

“Belarus tərəfi əvvəldən Ukraynada eskalasiyanın qarşısını almaq üçün sülhməramlı addımlar atdı. Ona görə də biz əvvəldən bəyan etmişik ki, biz Ukrayna üzrə sülh danışıqları başlayanda masa arxasında yer tutmağa iddialıyıq”, - nazir müavini bildirib.

Ambrazeviç əlavə edib ki, Belarusun öz təhlükəsizliyinə zəmanət alması vacibdir. Onun sözlərinə görə, yekun razılaşmalar əldə edilərkən tərəflər Minskin maraqlarını nəzərə almalı olacaqlar.

Dekabrın 13-də Amerikanın “The New York Times” qəzeti gələn ilin Ukrayna münaqişəsi ilə bağlı danışıqlar ili olacağını yazıb. Jurnalistlərin fikrincə, bu, Kiyev üçün pis xəbərdir, çünki o, ərazilərini itirməkdə davam edir və güclü danışıqlar mövqeyinə malik deyil.

Bundan əvvəl Ukrayna Rusiya Federasiyası ilə güc mövqeyindən danışıq aparmağın mümkünsüzlüyünü bəyan etmişdi.

 

Nigar