OPEC-in neft hasilatı avqust ayında azalıb

OPEC-in aylıq neft bazarı hesabatına görə, avqust ayında xam neft hasilatı ən çox Nigeriyada artarkən, gündəlik hasilat ən çox azalan Liviyada olub.

Nigeriyada hasilat sutkada 57 min barrel artaraq 1 milyon 448 min barelə yüksəldiyi halda, Liviyada 219 min barrel azalaraq 956 min barrelə düşüb.

Eyni dövrdə qrupun ən böyük neft istehsalçısı olan Səudiyyə Ərəbistanında hasilat gündəlik 25 min barrel azalaraq 8 milyon 983 min barelə düşüb.

OPEC-in xam neft hasilatı avqust ayında əvvəlki ayla müqayisədə gündəlik 197 min barrel azalaraq 26 milyon 590 min barrelə düşüb.

Bu dövrdə OPEC və OPEC-ə daxil olmayan bəzi istehsalçı ölkələrdən ibarət OPEC+ qrupunun gündəlik ümumi xam neft hasilatı əvvəlki ayla müqayisədə 304 min barrel azalaraq 40 milyon 655 min barel olaraq qeyd edilib.

OPEC bu il üçün qlobal neft tələbi ilə bağlı proqnozunu əvvəlki proqnozu ilə müqayisədə gündəlik 80 min barel azaldıb.

Müvafiq olaraq, qlobal neft tələbinin bu il keçən ilə nisbətən gündəlik 2 milyon barrel artaraq 104 milyon 240 min barrelə çatacağı gözlənilir.

OECD ölkələrində neftə tələbatın bu il gündəlik 130 min barel artaraq 45 milyon 780 min barrelə çatacağı təxmin edilir. İƏİT üzvü olmayan ölkələrdə bu il tələbatın gündəlik 1 milyon 900 min barel artaraq 58 milyon 470 min barrelə çatacağı gözlənilir.

Digər tərəfdən qlobal tələbatın 2025-ci ildə gündəlik 1 milyon 740 min barrel artaraq 105 milyon 990 min barrelə çatacağı gözlənilir. Bu artım OPEC-in ötən ayki hesabatında proqnozlaşdırdığı artımdan gündəlik 40 min barel aşağı olub.

Bu dövrdə tələbin OECD ölkələrində gündəlik təxminən 110 min barel, OECD üzvü olmayan ölkələrdə isə gündəlik 1 milyon 640 min barel artacağı təxmin edilir.

 

Nigar