Hindistan öz mövqeyinə aydınlıq gətirib

Rusiyadakı fövqəladə və səlahiyyətli səfir Kapoor Pavan bildirib ki, Ukraynada nizamlanma hər iki müharibə edən tərəf üçün məqbul olan razılaşmalar olacağı təqdirdə mümkündür və buna görə də Hindistan İsveçrədə keçirilən sülh sammitinin yekun bəyannaməsini imzalamayıb.

“Hindistan Ukraynadakı vəziyyətlə bağlı dünyanın narahatlığını bölüşür və münaqişənin sülh yolu ilə həllini təşviq etmək üçün istənilən kollektiv istəyi dəstəkləyir”, - o deyib.

 

Səfirin sözlərinə görə, Yeni Dehli hərbi əməliyyatların dayandırılması üçün Kiyev və Moskva arasında “bütün maraqlı tərəflərin birgə səyləri və səmimi və praktiki qarşılıqlı fəaliyyət tələb olunur” mövqeyindədir.

 

Pavan qeyd edib ki, Hindistan həm Rusiya, həm də Ukrayna ilə qarşılıqlı əlaqəni davam etdirəcək. “...Bizim fikrimizcə, yalnız hər iki tərəf üçün məqbul olan variantlar davamlı sülhə gətirib çıxara bilər. Bu yanaşmaya uyğun olaraq, biz bu sammitin nəticəsi olaraq qəbul edilmiş kommünike və ya hər hansı digər sənədi imzalamamaq qərarına gəldik”, - deyə o, yekunlaşdırıb.

 

Sülh sammiti iyunun 15 və 16-da İsveçrənin Bürgenstok kurortunda baş tutub və 100 nümayəndə heyəti iştirak edib. Tədbir Ukrayna prezidenti Vladimir Zelenskinin 2022-ci ilin payızında təklif etdiyi Sülh Formulasına əsaslanırdı.

 

Yekun kommünike 91 ölkədən 80-i, o cümlədən Macarıstan, Slovakiya, Serbiya, Argentina, Türkiyə və Gürcüstan tərəfindən imzalanıb. Hindistan, Səudiyyə Ərəbistanı, Cənubi Afrika Respublikası, Braziliya, BƏƏ, Ermənistan, Tailand və Meksikanın nümayəndələri imzalamaqdan imtina ediblər.

 

Miri