Son həftə koronavirus infeksiyasına yoluxma kəskin artımla davam edir. Mart ayı üçün bu rəqəmlər gözlənilən və proqnozlaşdırılan idi.

Oxu24.com xəbər verir ki, bu sözləri infeksionist Vüqar Cavadzadə deyib. O, hələ də karonavirus infeksiyasına inanmayanların olduğunu bildirib:

“Son günlər ambulator olaraq baxdığım xəstələrin hamsı müxtəlif məclislərdə yoluxub. Maraqlısı budu ki, hamsı da yaşlı insanlardır. Aralarında 60 yaşdan tutmuş 82 yaşa qədər xəstələr var. Yaşlı insanların demək olar ki, yanaşı xəstəlikləri olsa da, bu xəstəliyi ciddiyə almırlar. Yaşlı insanları təbii ki, övladları aparır bu məclislərə. Demək onların övladları da məsuliyyətsizlik edərək, öz valideyinlərini bilə-bilə ölümə atırlar. Yaşlı insanlar əgər məclislərə gedirlərsə, onlar öz övladlarına, nəvələrinə və digərlərinə necə deyə bilərlər ki, maska taxın, sosial məsafə gözləyin, qapalı məkanlara getməyin”.

Həkim bəzi yaşlıların vaksin vurdurmadığını da deyib:
“Xəstələnən bəzi yaşlılar heç vaksin vurdurmayıblar.
Bir ildir ki, bütün TV, radio, saytlar koronavirusa qarşı əks-epidemik tədbirlərdən danışır.
Həkimlər insanları maarifləndirirlər, amma bəzi insanlar öz düşüncələrindən əl çəkmək istəmirlər. Bir ildə 3000-dən çox insan virusdan dünyasın dəyişib, amma yenə insanlar bunu ciddiyə almırlar”.

V. Cavadzadə insanların karantinin ləğv edilməsini istədiklərini bildirib:

“Bir çox insanlar deyir ki, karantin tədbirləri ləğv edilsin. Profilaktik tədirlərə əməl etmir, digər tərəfdən də karantinin ləğv edilməsin istəyirlər. Özü nələrəsə əməl etmək istəmir, amma digər birinin yoluxdurub öldürməsinə heç əhəmiyyət vermir.
Niyə kiməsə görə, kimsə ölməlidi?
Həkimlərimiz öz profillərində maarifləndirici yazılar paylaşırlar, amma baxın insanların bəziləri həkimləri təhqir edirlər. Araşdırsan o adamlar öz ad, soyadın yazanda 9 səhv buraxırlar, iki kəlmə sözü ard-arda qoşub danışa bilmirlər”.

Həkimin sözlərinə görə, həkimlər virus barədə xəbərdarlıq edən zaman təhqir edilirlər:

“Həkimləri təhqir etmək nədir? Vaxtında qapalı məkanlarda vaxt keçirib yoluxanda, həmin o həkimlər sizi ölümdən xilas edir. Maska taxmırsız ki, havamız çatmır. Bəs həkimlər yayda 45 dərəcə istidə o sintetik formanın içində gün ərzində 8 saat qalanda, sizcə, necə olurdular? 8 saat yemək yox, su içmək yox, ayaq yolu da yox. Onlar sizin sağlamlığınız üçün özlərini odun içinə atıblar. Buna görə həkimləri təhqir edirsiniz?”

V. Cavadzadə qeyd edib ki, virusdan qorunmaq hər kəsin öz əlindədir:

“Profikaktik tədbirlərə bir çox insanlar əməl etmir. Sonra yoluxmalar artanda başlayacaqlar yazmağa. Xəstəxanada yer yoxdu, təcili yardım gec gəlir, yaxud da testlərin cavabı gec verilir.
İndidən tədbirlərə əməl etmək lazımdır ki, sonda nədənsə şikayətlənməyək.
Son günlər küçələrdə maska taxmayan insanların sayı çox artıb. Sanki virus yoxdu.
Onu da deyim ki, son günlərdə yoluxan insanlar xəstəliyi daha ağır keçirir, müalicəyə demək olar ki, tabe olmur.
Virusdan qorunmaq hərənin öz əlindədir. Buna görə də nə Operativ Qərargahı, nə Səhiyyə Nazirliyini, nə də Təbibi günahlandırmayaq”.