Sərt karantində itin yiyəsinin kim olduğu necə müəyyənləşdiriləcək? — Kamran Əliyevdən AÇIQLAMA

“Sərt karantin rejimində itlərin küçəyə çıxarılması hallarından sui-istifadə edilməməlidir. Hər şeyi cəza ilə, cərimə ilə tənzimləmək olmaz. Burada insan təfəkkürü, düşüncəsi əsasdır. Hər kəs başa düşməlidir ki, bu onun öz sağlamlığını qoruması naminə atılan addımdır. İnsanlar bir qədər məsuliyyətli olub, sui-istifadə hallarına yol verməməlidirlər”.
 

Bu sözləri “Ölkə.Az”a açıqlamasında Baş Dövlət Yol Polisi İdarəsi İctimaiyyətlə əlaqələr şöbəsinin rəisi, polis polkovniki Kamran Əliyev deyib.

Əməkdaşımızın “ev heyvanlarının gəzdirilməsində sui-istifadə hallarının qarşısını almaq üçün hansı addımlar atılacaq, itin kimə məxsus olduğu necə müəyyənləşdiriləcək” sualına K.Əliyevin bunu sırf insanların vicdanına buraxdıqlarını deyib.

“Hər dəfə bununla bağlı, polis işçiləri iti gəzdirənin kimliyini müəyyənləşdirmək üçün araşdırma apara bilməz. Belə addım atmamağı insanların öz ixtiyarına, vicdanlarına buraxırıq. Bu cür hallardan sui-istifadə etmək, düzgün deyil”.

Daha sonra o, bu cür hallardan yersiz istifadənin qarşısını almaq üçün müəyyən qadağaların tətbiq olunacağının qaçılmaz olduğunu bildirib.

“Nəzərə alınmalıdır ki, əgər ev heyvanlarının küçəyə çıxarılmasında sui-istifadə halları olarsa, bu vəziyyətin qarşısının alınması məqsədilə ötən həftə olduğu kimi bu dəfə də müəyyən məhdudiyyətlər tətbiq oluna bilər”,- deyə, Kamran Əliyev vurğulayıb.

Qeyd edək ki, 14 iyun saat 00:00-dan 16 iyun saat 06:00-dək ölkədə tətbiq olunan sərt karantin rejimi zamanı vətəndaşlar itini küçəyə çıxarmaq zərurəti yaranarsa, qısa müddət ərzində yalnız yaşadığı binanın həyətində ev heyvanlarını gəzdirə bilər.