Şuşada qayalara yazı yazanlara qarşı tədbir güclənməlidir 

Şuşada qayalara və təbiət ərazilərinə müxtəlif yazıların yazılması, işarələrin qoyulması yolverilməzdir və bu kimi halların qarşısının alınması üçün maarifləndirmə işləri gücləndirilməlidir.

Modern.az-a açıqlamasında turizm eksperti Ceyhun Aşurov belə deyib.

Onun sözlərinə görə, buna bənzər hallara əvvəllər Azərbaycanın digər turizm məkanlarında da rast gəlinib.

“Təəssüf ki, bu kimi hallar bəzən müşahidə olunur. Vaxtilə Qobustanda qayalara müəyyən yazıların yazılması və işarələrin qoyulması halları olub. Göygöl ziyarətçilərin üzünə açıldıqdan sonra da ərazinin zibillənməsi, ağaclara və hasarlara müxtəlif yazıların yazılması cəhdləri müşahidə edilirdi. Bu gün də Qarabağın gözü olan Şuşada qayalara yazı yazanlara rast gəlmək mümkündür”, - ekspert bildirib.

C.Aşurov qeyd edib ki, belə hallar dünyanın müxtəlif turizm məkanlarında da mövcuddur. Lakin bunun beynəlxalq praktikada da baş verməsi həmin davranışı qəbulolunan etmir:

“Məsələn, Eyfel qülləsinin üzərində də müxtəlif yazılara rast gəlmək mümkündür. Amma istənilən halda bu, xoşagəlməz və yolverilməz haldır”.

Ekspert hesab edir ki, xüsusilə Şuşa və Qarabağ istiqamətində turistlərin böyük hissəsinin təşkil olunmuş turlarla səfər etməsi nəzərə alınmalı, turizm şirkətləri və bələdçilər bu istiqamətdə daha fəal maarifləndirmə aparmalıdırlar.

“Turizm şirkətləri və bələdçilər turistlərə əvvəlcədən izah etməlidirlər ki, tarixi abidələrə, qayalara, ağaclara və digər təbiət obyektlərinə yazı yazmaq, işarələr qoymaq olmaz. Cərimələr nəzərdə tutulsa da, təəssüf ki, ayrı-ayrı hallarda buna yenə rast gəlinir”, - o vurğulayıb.

Ceyhun Aşurov bildirib ki, bu hallar kütləvi xarakter daşımır və onların qarşısını almaq mümkündür.

“Bu, yalnız hansısa dövlət və ya icra qurumunun işi deyil. Vətəndaşlar, turizm şirkətləri, bələdçilər və yerli sakinlər də bu məsələdə məsuliyyət daşıyırlar. Belə bir hal gördükdə onun qarşısını almağa çalışmaq və insanları tarixi abidələrə, təbiətə zərər vura biləcək davranışlardan çəkindirmək lazımdır”.

Ekspertin sözlərinə görə, Qarabağda geniş quruculuq işlərinin aparıldığı bir dövrdə həmin ərazilərin tarixi, mədəni və təbii görünüşünün qorunması xüsusilə vacibdir.

Həmçinin oxuyun

Şəhid anası Şuşada qayalara yazı yazanlara etirazını bildirdi:Bu tarixi abidələr bizim qan yaddaşımızdır  

Əhaliyə xəbərdarlıq:Sentyabrın 7-dən 8-i səhərədək

"Ehdiparfum"u  videoya  görə hansı cəza gözləyir? -AÇIQLAMA 

Bakıda yaşayanların diqqətinə!Məhdudiyyətlər aradan qaldırılıb